9–10 кастрычніка ў Вышэйшай духоўнай семінарыі ў Гродне прайшоў дзень засяроджання.
Гэты час будучыя святары прысвяцілі малітве і роздуму пра пакліканне ў цішыні.
У гэтым ім дапамагаў дасведчаны душпастыр ксёндз Антоній Абухоўскі, пробашч парафіі Унебаўзяцця Найсвяцейшай Панны Марыі і св. Язафата ў Сапоцкіне. Увазе семінарыстаў святар прапанаваў шэраг канферэнцый, у якіх падзяліўся ўласнымі думкамі пра святарскае жыццё і служэнне.
„Прыглядаючыся да шляху святарства, трэба ў першую чаргу звяртаць увагу на тое добрае, што дорыць нам Пан Бог. Гэта і фармацыя, і час малітвы, і людзі, якіх Ён ставіць на нашай дарозе”, – падкрэсліў ксёндз Антоній у адной са сваіх гамілій.
Акрамя супольнай Эўхарыстыі, семінарысты мелі магчымасць разам разважаць над таямніцамі святога Ружанца і падзяліцца сваімі перажываннямі з Езусам перад выстаўленым Найсвяцейшым Сакрамэнтам.
Арцём Кір’янаў
Фота: Павел Леановіч