23 верасня ў парафіі св. Піо з П'етрэльчыны ў Гродне адбыліся адпустовая ўрачыстасць і ўнясенне рэліквій айца Піо.
Эўхарыстыю з гэтай нагоды ўзначаліў біскуп Гродзенскі Аляксандр Кашкевіч. Гамілію прамовіў кс. Аляксандр Мацкевіч, канцлер Гродзенскай курыі. Ён засяродзіў увагу ў гаміліі на тым, як айцец Піо ўразіў увесь свет сваім незвычайным жыццём і гарачай верай.
Святар нагадаў, што Піо з П'етрэльчыны быў спаведнікам, якому Бог удзяліў ласку пранікнення ў сумленне людзей. Калі ён цэлебраваў святую Імшу, усе ведалі, што на алтары на самой справе здзяйсняецца вялікая таямніца веры, адзначыў кс. Мацкевіч. Акрамя таго, дадаў канцлер курыі, айцец Піо быў стыгматыкам, чалавекам пастаяннай малітвы, шанаваў Маці Божую і сапраўды няма на зямлі месца, дзе б не чулі пра такога вялікага святога.
Напрыканцы біскуп благаславіў вернікаў рэліквіямі святога Піо.
Ксёндз Артур Малафей, пробашч парафіі, падзякаваў усім за ўдзел ва ўрачыстасці, а айцам рэдэмптарыстам, гаспадарам капліцы, дзе яна адбылася, падзякаваў за магчымасць для маладой парафіі збірацца на Эўхарыстыю.
Таксама вернікі парафіі св. Піо выказалі найлепшыя пажаданні біскупу Аляксандру Кашкевічу ў дзень яго нараджэння.
Парафія св. Айца Піо ў Гродне пасведчанне аб дзяржаўнай рэгістрацыі атрымала11 лютага. Новая парафія ахоплівае мікрараён Грандзічы-2, гарадскую частку Забалаці і прылеглыя вёскі.
Згодна з рашэннем біскупа Гродзенскага пробашчам парафіі прызначаны кс. Артур Малафей.
Ян Раманчук
