Кожны год напярэдадні Вялікадня ААТ “Гроднахлебпрам” радуе гродзенцаў і жыхароў рэгіёну смачнай і свежай святочнай выпечкай.
Як паведамляе grodnonews.by, духмяныя здобныя кулічы і кексы заўсёды карыстаюцца попытам, а ўсе рэцэптуры распрацоўваюцца з улікам густаў і патрэбаў жыхароў рэгіёну.
Напрыклад, у складзе традыцыйных кулічоў цукар, ваніль, шафран, разынкі, цукаты. У залежнасці ад найменавання прадукцыі тут выпускаюць выпечку з павідлам, фруктовымі напаўняльнікамі і крэмамі.
У гэтым годзе напярэдадні свята на прадпрыемства запрасілі ксяндза каноніка Антонія Грэмзу, віцэ-канцлера Гродзенскай курыі, каб благаславіць усю велікодную прадукцыю і тыя лініі, дзе яна вырабляецца. Такім чынам, тут паклапаціліся аб жыхарах горада. Цяпер благаслаўлены куліч можна будзе набыць у краме.
“Велікодная радасць мацнейшая за любыя нягоды, таму сёння мы прасілі Бога аб благаслаўленні супрацоўнікаў прадпрыемства і благаславілі святочную прадукцыю. Самае галоўнае – ведаць, што Бог разам з намі і дапамагае перажываць усе выпрабаванні на жыццёвым шляху ”, – падкрэсліў кс. Антоні Грэмза.
Акрамя кулічоў і кексаў, карыстаюцца папулярнасцю духмяныя пернікі. Асаблівае месца сярод велікоднай прадукцыі займаюць слодычы ручнога вырабу з начыннем і пакрытыя глазурай. У кожны распісаны пернік кандытары ўкладаюць душу.
Фота: grodnonews