Вернікі і духавенства развіталіся са спачылым кс. канонікам Алегам Дулем у Ваўкавыску

6 красавіка ў касцёле св. Станіслава Косткі ў Ваўкавыску адбылося пахаванне кс. каноніка Алега Дуля, які апошнія 13 гадоў быў пробашчам гэтай парафіяльнай супольнасці і дэканам Ваўкавыскага дэканату.

У святыні, якая была пабудавана дзякуючы старанням спачылага, сабраліся шматлікія святары, сёстры законныя і вернікі, якім з вялікай адданасцю служыў кс. Алег.

Эўхарыстыю ў інтэнцыі неспадзявана памерлага святара ўзначаліў біскуп Гродзенскі Аляксандр Кашкевіч. Прысутнічаў таксама дапаможны біскуп Гродзенскай дыяцэзіі Юзаф Станеўскі.

На пачатку Імшы біскуп Кашкевіч падкрэсліў, што ксёндз Алег адышоў, мяркуючы па-чалавечы, заўчасна, бо пражыў няпоўныя 47 гадоў. Аднак, заўважыў іерарх, за свае больш чым 20 гадоў святарскага служэння Касцёлу на Гродзеншчыне ён зрабіў вельмі шмат. У сэрцах вернікаў ён застанецца як будаўнік святыні і кіраўнік шматлікіх пілігрымак па святых месцах усёй Еўропы.

Пастыр Касцёла на Гродзеншчыне падзякаваў спачыламу за тое, што ён умеў цешыцца дарам святарства, якое атрымаў ад Езуса Хрыста, Найвышэйшага Святара.

У гаміліі біскуп Юзаф Станеўскі падкрэсліў, што смерць святара з’яўляецца для ўсіх урокам і напамінам, што няўхільнае расстанне з гэтым светам, а таксама напамінам пра канчатковае прызначэнне чалавека.

Іерарх дадаў, што кс. Алег з адвагай прымаў заданні, даручаныя яму Касцёлам, і заўсёды ішоў наперад, не зважаючы на розныя перашкоды, і, што найважнейшае, – дасягаў поспеху.

Вернікі, што знаходзяцца ў жалобе пасля страты свайго душпастыра, у гэты дзень не хавалі слёз узрушэння і болю. Гэта быў адзіны святар, які служыў у іх парафіі. Ён яднаў іх з Богам, указваў шлях, удзяляў святыя сакрамэнты, абвяшчаў Божае слова. Таму гэтая неспадзяваная смерць была для іх вялікім ударам.

Вернікі перажывалі ў сваёй парафіі велікапосныя рэкалекцыі. У пятніцу 3 красавіка, удзельнічаючы ў набажэнстве Крыжовага шляху, яны нават не ведалі, што ў гэты час у плябаніі паміраў іх святар і душпастыр, які служыў ім усім сваім сэрцам. У душы вернікаў назаўсёды застануцца словы, якія ён вельмі часта, калі парафіяне звярталіся да яго са сваімі праблемамі, паўтараў: “Усё будзе добра”.

Сёлетнія рэкалекцыі для вернікаў гэтай асірацелай парафіі надоўга застануцца ў яе гісторыі, іх будуць памятаць доўгія гады, а можа, нават распавядаць пра іх з пакалення ў пакаленне, бо падчас іх яны страцілі свайго пробашча, які вёў іх да Пана.

Ксёндз Алег Дуль быў пахаваны ля касцёла. Ён застанецца пры той святыні, якую з вялікай руплівасцю ўзводзіў для Пана, каб вернікі мелі свой малітоўны дом.

Парафіяне глыбока вераць, што іх святар будзе дапамагаць ім цяпер з неба. А яны, ідучы ў святыню, будуць спыняцца ля яго магілы, узносіць за яго малітвы і дзякаваць за кожнае дабро, якое атрымалі праз яго адданае служэнне.

Ксёндз канонік Алег Дуль нарадзіўся ў 1973 г. у в. Падгалішкі, якая належыць да парафіі Найсвяцейшай Тройцы ў Забалаці (Радунскі дэканат).

У 1997 г. скончыў Вышэйшую духоўную семінарыю ў Гродне, 16 кастрычніка 1999 г. атрымаў прэзбітэрскае пасвячэнне з рук біскупа Аляксандра Кашкевіча.

З 1999 па 2000 гг. служыў вікарыем у сваёй роднай парафіі ў Забалаці, адначасова абслугоўваў парафію Унебаўзяцця Найсвяцейшай Панны Марыі ў Начы, Божай Міласэрнасці ў Доцішках і св. Юрыя ў Асаве.

З 2000 г. распачаў служэнне ў якасці пробашча ў парафіі ў Начы.

З 2007 года быў пробашчам парафіі св. Станіслава Косткі і дэканам Ваўкавыскага дэканату.

Памёр 3 красавіка 2020 г. у Ваўкавыску, на наступны дзень пасля смерці свайго бацькі.

Кс. Юрый Марціновіч

Фота: Віталій Гурэц