У апошнія выхадныя сакавіка адбыліся велікапосныя рэкалекцыі ў парафіі св. Уладзіслава ў Суботніках (Іўеўскі дэканат). Па запрашэнні пробашча парафіі кс. Аляксандра Лебядзевіча са словамі навукі да вернікаў звярнуўся кс. Алег Пятрашка, духоўны айцец студэнтаў першага курса Вышэйшай духоўнай семінарыі ў Гродне і Пінску.
На працягу трох дзён з 27 па 29 сакавіка святыя Імшы з навукай для ўсіх адбываліся ў касцёле святога Уладзіслава ў Суботніках і ў капліцы Хрыста Валадара і Маці Божай Фацімскай у Жамыслаўлі.
У першы дзень рэкалекцый разважанні былі засяроджаны на тым, якім чынам мы павінны шукаць, знаходзіць і спрабаваць усталяваць сувязь з Богам. Святар звярнуў увагу, што наш нябесны Айцец шукае і прагне такіх вернікаў, якія будуць ушаноўваць Бога ў духу і праўдзе: у духу – на ўзроўні сэрца і любові, у праўдзе аб сабе, такім, які я ёсць.
У другі дзень разважанняў святар заклікаў убачыць, што з’яўляецца перашкодай для разумення слоў Пана ў нашым жыцці, адкінуць пыху і шчыра прабачыць тым, хто нас пакрыўдзіў. Чалавек прагне шчасця, але сам, без Бога, яго не пабудуе, толькі разам з Езусам можна ўпэўнена, цвёрда крочыць па жыцці. Ксёндз Алег заклікаў шукаць Бога ў сваім жыцці, імкнуцца да Яго, а прыйшоўшы да Бога, хацець паўнаты жыцця з Ім.
Трэці дзень рэкалекцый быў прысвечаны вопыту Божай любові. Як было адзначана, Езус звяртаецца да нас мовай любові, і, каб зразумець Яго, трэба адкрыцца на гэтую любоў, змяніць сваё сэрца, часта каменнае, зацвярдзелае. Калі мы сустракаемся з Богам на ўзроўні сэрца, тады разумеем мову любові Езуса, пачынаем глядзець на сябе сапраўднага, шчыра, з дзіцячым даверам звяртаемся да Яго.
Падчас рэкалекцый вернікі мелі магчымасць прыступіць да сакрамэнту пакаяння і паяднання.
Пробашч кс. Аляксандр Лебядзевіч падзякаваў кс. Алегу Пятрашку за мудрыя словы навукі і выказаў спадзяванне, што яны прынясуць добрыя плёны ў сэрцах парафіян.
Людміла Пясецкая