У парафіі святога Міхала Арханёла ў Смаргоні адбыўся вечар пад назвай “Пакаленне 2.0”, у якім прынялі ўдзел амаль 240 чалавек.
Як паведамляе sdb.by, згодна з салезіянскай традыцыяй святкаванне распачалося са святой Імшы.
Свята працягнулася ў араторыі святога Яна Боско, які дзейнічае пры парафіі. Падчас яго адбылося параўнанне новага і старога пакаленняў. Кожны меў магчымасць праявіць свае таленты. У межах праграмы ва ўдзельнікаў быў час, каб пасмяяцца і задумацца, патанчыць і паспяваць, а таксама адчуць сябе часткай адной вялікай салезіянскай сям’і.
На заканчэнне вечару адбылася малітва.
Падчас “слоўка” аніматары праз сцэнку паказалі, наколькі важны час, які мы часта літаральна губляем у тэлефоне і сацыяльных сетках. Яны падкрэслілі, што найбольшым скарбам для кожнага чалавека з’яўляюцца іх родныя і блізкія, іх выхавацелі, святары і сёстры законныя. Таму кожнаму варта самастойна вырашыць, на што і як ён будзе траціць свой час.
Пасля гэтага вечару, поўнага радасці ад прабывання разам, вернікі салезіянскай парафіі жадаюць па-Божаму і ў засяроджанасці перажываць перыяд Вялікага посту.
