7 студзеня пасля святочных канікул навучэнцы Вышэйшай духоўнай семінарыі ў Гродне вярнуліся ў сцены роднай Alma Mater – у іх распачалася экзаменацыйная сесія. Але перад тым, як пачаць рыхтавацца да экзаменаў, новы каляндарны год супольнасць семінарыі правяла ў цішыні і засяроджанні.
Дзень засяроджання правёў духоўны айцец семінарыі кс. Ян Сарэла, які прапанаваў навучэнцам засяродзіцца над тэмай цішыні і прабачэння ў жыцці святара.
“Кожны святар павінен любіць цішыню, бо ў цішыні можна пачуць голас Бога”, - адзначыў падчас уступнай канфэрэнцыі кс. Ян.
Засяроджанасць над Божым словам, цішыня, малітва, адарацыя Найсвяцейшага Сакрамэнту і споведзь паспрыялі аднаўленню духоўных сіл пасля канікул і адпачынку. У плане дня семінарыстаў таксама была малітва на брэвіярыі, Ружанец з разважаннямі і канферэнцыя.
Галоўным пунктам і завяршэннем падзеі стала супольная Эўхарыстыя.
Aндрэй Юхнік
Фота: Павел Леановіч
