У Альбярціне і на Петралевіцкай гары ўшанавалі памяць ахвяраў Другой сусветнай вайны

14 снежня ў парафіі Маці Божай Каралевы Супакою ў Альбярціне (Слонімскі дэканат) ушанавалі памяць ахвяраў Другой сусветнай вайны. У парафіяльнай святыні сабраліся шматлікія вернікі гэтага дэканату і госці.

Прыбылі таксама біскуп Гродзенскі Аляксандр Кашкевіч і а. Алег Шэнда, кусташ Беларускай кустодыі Ордэна Меншых Братоў Капуцынаў.

На пачатку а. Юрый Катовіч OFMCap., душастыр парафіі, распавёў сабраным пра жудасную падзею, якая мела месца 77 гадоў таму ў Слоніме. У час адной з масавых расправаў у ноч з 18 на 19 снежня 1942 г. на месцы пад назвай Петралевіцкая гара каля Слоніма былі забіты сотні людзей.

Сярод забітых былі с. Марта Валоўская – актыўная і энергічная настаяцельніца, а таксама с. Ева Наішэўская – ціхая, пагружаная ў сябе лекарка і настаўніца. Гэтыя законніцы, жыццё якіх было цесна звязанае, хоць кожная ішла сваім шляхам да Бога і святасці, належалі да Кангрэгацыі Сясцёр Беззаганнага Зачацця Найсвяцейшай Панны Марыі.

Сёстры прыехалі ў Слонім незадоўга да пачатку ІІ Сусветнай вайны. Абедзве вылучаліся душэўным супакоем і сілай духу. Разам прайшлі крыжовым шляхам дзвюх акупацый: савецкай і нямецкай. перажылі прыніжэнне, беднасць і голад, пазбаўленне даху над галавой і нават свабоды.

Сціплыя і заўсёды гатовыя дапамагчы, яны падтрымлівалі патрабуючых, галадаючых, сем’і вязняў і забітых. На тэрыторыі кляштара хавалі яўрэяў, патаемна дапамагалі людзям, якія хаваліся ў лясах каля Слоніма. У цёмныя ночы ці ў непагадзь тыя прыходзілі ў кляштар, каб атрымаць ад сясцёр якую-небудзь ежу, а таксама бінты, лекі, медыцынскую кансультацыю. Законніц шматразова перасцерагалі аб небяспецы, якая ім пагражае, аднак, нягледзячы на гэта, яны не спынялі сваю дзейнасць.

Потым біскуп Кашкевіч благаславіў абразы сясцёр, якія змешчаны назаўсёды ў святыні і будуць спрыяць таму, каб вернікі праз іх заступніцтва ўзносілі малітвы да Бога.

Затым пачалася святая Імша. Пастыр Касцёла на Гродзеншчыне падкрэсліў, што мясцовы Касцёл можа ганарыцца заступніцамі ў небе ў асобе бласлаўлёных сясцёр, a іх мучаніцкая кроў асвяціла гродзенскую зямлю. Іерарх дадаў, што іх прыклад заахвочвае сучасных людзей быць адважнымі ў вызнаванні сваёй веры.

Падчас працэсіі з дарамі былі прынесены рэліквіі благаслаўлёных, якія былі змешчаны ля благаслаўленых абразоў сясцёр Марты і Евы.

Пасля Імшы сабраныя накіраваліся на Петралевіцкую гару, якая стала нямой сведкай тых падзей, адной з Галгот ХХ стагоддзя. На месцы гэтай страшнай трагедыі яны памаліліся Вяночак да Божай Міласэрнасці, просячы Бога аказаць міласэрнасць усім загінулым, а таксама тым, хто ўчыніў гэтае масавае забойства.

---------

Благаслаўлёная с. Марта Валоўская ад Езуса

Нарадзілася 12 кастрычніка 1879 года ў Любліне (Польшча) у заможнай сям’і вядомага юрыста і грамадскага дзеяча. Ужо ў падлеткавым узросце вучыла іншых дзяўчат польскай мове і гісторыі.

Уваходзячы ў сталае жыццё, думала прa сужэнства, але адчула пакліканне да манаства і ўступіла ў Кангрэгацыю Сясцёр Беззаганнага Зачацця Найсвяцейшай Панны Марыі. На працягу многіх гадоў была настаяцельніцай у Мацееве на Валыні (сучасная Украіна).

Арганізавала дзіцячы дом для больш за сотню дзяцей розных нацыянальнасцяў, агульнаадукацыйную школу, настаўніцкую семінарыю і прафесійную школу.

Стварала вакол сябе атмасферу талерантнасці і гарманічнага суіснавання супольнасці, культурна і рэлігійна рознай.

Благаслаўлёная с. Ева Наішэўская ад Божагa Провіду

Нарадзілася 11 мая 1885 года ў Астанішках на Віленшчыне (сёння Літва). Была старэйшай дачкой з 11 дзяцей Казіміра Наішэўскага, вядомага акуліста і прафесара ўніверсітэта Стэфана Баторыя ў Вільні.

Падчас І Сусветнай вайны працавала ў ваеннай медыцынскай установе, маючы адпаведную адукацыю. Пасля прынясення манаскіх абяцанняў у Кангрэгацыі Сясцёр Беззаганнага Зачацця Найсвяцейшай Панны Марыі выконвала абавязкі ўрача супольнасці.

Працавала як настаўніца і выхавацельніца ў гімназіях у Язлоўцы (Украіна) і Слоніме. На працягу жыцця вяла запісы, якія з’яўляюцца свайго роду дзённікам душы. Гэта свабодныя нататкі, часта без даты.

Сёлета прыпадае 20-годдзе беатыфікацыі гэтых сясцёр. 13 чэрвеня 1999 г. за непахіснасць у веры і мужнасць Папа Ян Павел ІІ беатыфікаваў іх у групе 108 благаслаўлёных мучанікаў часоў ІІ Сусветнай вайны.

Кс. Юрый Марціновіч