Ва ўрачыстасць Беззаганнага Зачацця Найсвяцейшай Панны Марыі брат Уладзімір Лопух, які паходзіць з парафіі св. Ганны ў Варончы (Навагрудскі дэканат), падчас цырымоніі аблучын прыняў белы законны хабіт у Ордэне св. Паўла, першага пустэльніка (паўліны).
Урачыстасць адбылася ў санктуарыі Маці Божай Леснеўскай Апякункі сем’яў у Лесневе (Польшча).
Сведкамі гэтай урачыстай хвіліны былі бацькі, два браты і сястра бр. Уладзіміра, а таксама пробашч яго парафіі а. Юрый Саковіч OSPPE.
Брат Уладзімір Лопух – першы ў гісторыі парафіі св. Ганны ў Варончы, хто атрымаў пакліканне да святарскага і манаскага жыцця. Таму заахвочваем агарнуць малітвай маладога чалавека, каб пасля цудоўнай прыгоды навіцыяту ён мог працягваць законную фармацыю, ідучы шляхамі нашага жыцця з Хрыстом як Абраннікам і Сябрам, а ў будучыні стаў добрым святаром.
Кс. Юрый Марціновіч
