10 лістапада ў Доме міласэрнасці ў Сапоцкіне пачаліся рэкалекцыі перад прэзбітэрскім і дыяканскім пасвячэннямі. У іх удзельнічаюць адзін дыякан, які прыме прэзбітэрскае пасвячэнне, і пяць семінарыстаў, якія прымуць пасвячэнне дыяканату.
Новым прэзбітэрам дыяцэзіі стане дыякан Віталій Валюк.
Дыяканскае пасвячэнне атрымаюць Яўген Амасёнак, Андрэй Струкель, Павел Шэмет, Томаш Мікалайчык, Дзмітрый Малец.
Духоўныя практыкаванні праводзіць кс. Ян Сарэла, духоўны айцец Вышэйшай духоўнай семінарыі ў Гродне, які рыхтуе дыякана і семінарыстаў да гэтай вялікай падзеі ў іх жыцці.
Падчас рэкалекцый, якія працягнуцца да 15 лістапада, будучыя прэзбітэр і дыяканы разважаюць аб сваім пакліканні, а таксама ў цішыні і засяроджанасці рыхтуюцца да служэння на ніве Пана.
Традыцыйна іх наведаў біскуп Гродзенскі Аляксандр Кашкевіч, які паразмаўляў з кожным асабіста і ўдзяліў пастырскае благаслаўленне.
Пасвячэнні ўдзеліць 16 лістапада, ва ўрачыстасць Найсвяцейшай Панны Марыі Вастрабрамскай, галоўнай Апякункі Гродзенскай дыяцэзіі, біскуп Гродзенскі Аляксандр Кашкевіч у катэдральным касцёле св. Францішка Ксаверыя ў Гродне. Пачатак святой Імшы ў 12.00.
У Каталіцкім Касцёле існуе трывалая традыцыя, згодна з якой кандыдаты да прыняцця пасвячэння аднаго з трох узроўняў святарства (дыяканату, прэзбітэрату або біскупства) непасрэдна перад пасвячэннем павінны ўдзельнічаць у спецыяльных духоўных практыкаваннях.
Аточым сваімі малітвамі дыякана і семінарыстаў, каб яны маглі як мага лепш падрыхтавацца да служэння ў Касцёле, a з прыняццем пасвячэнняў служыць з вялікім запалам людзям і Богу.
Кс. Юрый Марціновіч