19-20 кастрычніка ў смаргонскім араторыі імя св. Яна Боско пры парафіі Св. Міхала Арханёла адбылася першая ў гэтым навучальным і катэхетычным годзе агульнабеларуская фармацыйная сустрэча салезіянскіх аніматараў. На ёй сабраліся аніматары і кандыдаты ў аніматары з Мінска, Смаргоні і Бараўлян.
Сустрэчу праводзілі ксяндзы салезіяне Алег Каралёў SDB, Артур Ляшнеўскі SDB i сёстры салезіянкі Юлія Клявец FMA і Дар’я Еўтухоўская FMA.
У плане мерапрыемства цэнтральнае месца займалі малітва і ўдзел у святой Імшы, бо мэтай сустрэчы была найперш духоўная фармацыя тых, хто хоча даваць сябе іншым. Удзельнікі супольна імкнуліся да паглыблення ведаў пра Бога і салезіянскую харызму, каб з новым запалам служыць дзецям і моладзі ў салезіянскіх араторыях.
Быў час таксама на забавы і гульні, на сумесны адпачынак. Маладыя людзі дзяліліся сваім досведам.
З новымі думкамі і ідэямі ўдзельнікі ад’язджалі дадому, каб рэалізоўваць пачутае ў жыцці.
Кс. Юрый Марціновіч
Фота: архіў смаргонскага араторыя
