З 27 па 29 верасня ў салезіянскім араторыі імя св. Яна Боско пры парафіі Св. Міхала Арханёла ў Смаргоні адбыліся святочныя мерапрыемствы.
Як паведамляе сайт sdb.by, 27 верасня ў араторыі распачаўся фармацыйны год членаў “Савіо-клубу” – суполкі для дзяцей, якія хочуць пасябраваць бліжэй з Езусам і наследаваць шлях святасці св. Дамініка Савіо.
Падчас літургіі кс. Ігар Лашук падкрэсліў важнасць чування перад эўхарыстычнай гостыяй, у постаці якой прысутнічае жывы Бог, і звярнуў увагу на св. Арханёла Міхала як моцнага апекуна ў змаганні за штодзённую святасць.
Святкаванне працягнулася ў араторыі.
28 верасня там распачаўся новы аратарыйны сезон.
Падчас Эўхарыстыі адказны за смаргонскі араторый кс. Артур Ляшнеўскі SDB разважаў пра маўчанне апосталаў, якія пачулі ад Збаўцы пра Яго пакутніцкую смерць, адзначыўшы, што “Бога трэба прыняць цэласна, і так хрысціяне павінны прымаць волю Айца, якая з’яўляецца найлепшым партрэтам Бога ў нашым жыцці”.
Пасля ў араторыі адбыўся забаўляльны вечар для моладзі, дыскатэка і прагучала падрыхтаванае аніматарамі “слоўка”, у якім былі прадстаўлены правілы смаргонскага араторыя. Потым моладзь вярнулася ў касцёл на 40-гадзіннае набажэнства, якое мела мэту падрыхтаваць вернікаў да парафіяльнага свята св. Міхала Арханёла. Завяршылася адарацыя вігілійнай Імшой апоўначы і працэсіяй з абразом святога Міхала вакол касцёла.
29 верасня, у свята святых Арханёлаў Міхала, Габрыэля і Рафала і Габрыэля, вернікі Смаргоні аддалі пашану свайму нябеснаму заступніку.
Святкаванне пачалося з урачыстага адкрыцця аратарыйнага сезону для дзяцей. Апоўдні адбылася адпустовая Эўхарыстыя, якую ўзначаліў кс. Яўген Учкуроніс, пробашч смаргонскай парафіі Св. Яна Паўла II. У гаміліі ён растлумачыў значэнне імёнаў святых Арханёлаў, а таксама нагадаў гісторыю смаргонскага касцёла і малітву “Хто ж як Бог”, якой сімвалічна маліліся мясцовыя вернікі, калі святыню аддавалі прадстаўнікам іншых канфесій ці ўвогуле забралі пад склад.
Пасля Імшы адбылася эўхарыстычная працэсія.
