З 21 па 25 жніўня сёстры Кангрэгацыі Дачок Маці Божай Балеснай (серафіткі) арганізавалі рэкалекцыі для дзяўчат у Кальварыі Зэбжыдоўскай (Польшча). У рэкалекцыях удзельнічала група дзяўчат з парафіі Унебаўзяцця Найсвяцейшай Панны Марыі і св. Язафата Кунцэвіча ў Сапоцкіне, дзе больш за 25 гадоў служаць серафіткі.
Тэмай рэкалекцый сталі словы “Поўная ласкі”. Усе гэтыя дні дзяўчаты разам з законніцамі разважалі пра Маці Божую, пра тое, што азначаюць гэтыя Яе словы і што трэба рабіць, каб стаць падобнай да Марыі. Падчас набажэнства Крыжовага шляху ўдзельніцы разважалі над тым, што перажывала і адчувала Марыя ў хвіліны смерці свайго Сына.
Рэната Станкевіч, адна з удзельніц, адзначае, што на сустрэчы дзяўчаты навучыліся давяраць сваё жыццё Богу на ўзор Марыі. “Сёстры серафіткі дапамаглі нам пазнаць Маці Божую з іншага боку, а супольныя малітвы і адарацыя з’ядналі нас яшчэ больш з Панам”, – кажа дзяўчына.
Віялета Гедо, якая таксама ўдзельнічала ў гэтых духоўных практыкаваннях, кажа, што была магчымасць пабыць з Езусам сам-насам у маўчанні, на адарацыі, у малітве. “З гэтых рэкалекцый я вынесла для сябе жыццёвы дэвіз – “Жыві тут і цяпер”. Я зразумела, што не трэба занадта абцяжарваць сябе мінулым і будучыняй, бо тады мы не прысутнічаем тут і цяпер. Дастаткова проста давяраць Найвышэйшаму, а Ён будзе цябе весці”, – дадае яна.
Дыяна Гедо, якая ўдзельнічае ў рэкалекцыях у серафітак ужо другі раз, прызнаецца, што кожны раз гэта вучыць яе чамусьці новаму і набліжае да Езуса і Марыі. “Дзякуючы рэкалекцыям я зразумела важнасць кожнай хвіліны жыцця, тое, што трэба жыць “тут і цяпер”, цаніць кожную хвіліну”, – адзначае дзяўчына.
Падчас духоўных практыкаванняў удзельніцы мелі магчымасць пазнаёміцца бліжэй з харызмай Кангрэгацыi Дачок Маці Божай Балеснай, якая ўзнікла ў 1881 годзе. Яна была заснавана ў Закрочыме (Польшча) бл. а. Ганаратам Казьмінскім OFMCap і бл. Малгажатай Шэўчык.
Kс. Юрый Марціновіч