8 ліпеня святой Імшой у катэдральнай базыліцы св. Францішка Ксаверыя распачалася XXI пешая пілігрымка з Гродна ў санктуарый Гродзенскай дыяцэзіі Маці Божай Каралевы нашых сем’яў у Тракелях.
Урачыстую Імшу ўзначаліў біскуп Гродзенскі Аляксандр Кашкевіч. Іерарх даручыў пілігрымам асабліва важныя для яго інтэнцыі. Найперш ён прасіў маліцца за ўсе сем’і нашай краіны, каб у кожнай было месца для Бога.
Біскуп заахвоціў ахвяраваць працу пілігрымавання таксама ў інтэнцыі новых святарскіх і манаскіх пакліканняў у мясцовым Касцёле. Таксама ён прасіў агарнуць малітвай усіх маладых людзей Гродзенскай дыяцэзіі, каб у сваім жыцці яны ставілі на першым месцы Бога і былі Яму верныя.
У гаміліі кс. канонік Павел Салабуда, кіраўнік пілігрымкі, нагадаў дэвіз сёлетняга паломніцтва: “З Марыяй у новы час”. Святар падкрэсліў, што Найсвяцейшая Маці ніколі не змяняецца, увесь час застаецца той жа самай – поўнай клопату пра справы кожнага чалавека. А часы, у якія мы жывем, маланкава змяняюцца. Таму кс. Салабуда заклікаў чытаць знакі часу і адказваць згодна з духам Евангелля на выклікі нашай эпохі.
Святар назваў пілігрымаў “прыгожым знакам”, які яны будуць даваць на працягу пяці дзён шляху жыхарам вёсак і мястэчак, праз якія будуць праходзіць.
“Будзьце знакам веры, Езуса і Марыі для ўсіх тых, каго будзеце сустракаць па дарозе”, – дадаў кіраўнік пілігрымкі.
Пасля Імшы, прыняўшы благаслаўленне свайго пастыра, група вернікаў рознага ўзросту, сярод якіх ёсць святары, сёстры законныя і семінарыст, вырушыла ў дарогу.
На юбілейныя ўрачыстасці ў Тракелях, дзе сёлета будзе адзначацца 25-годдзе абвяшчэння мясцовай парафіяльнай святыні Дыяцэзіяльным санктуарыем Маці Божай Каралевы нашых сем’яў, 10-годдзе каранацыі цудадзейнага абраза Маці Божай Тракельскай і 210-годдзе пабудовы касцёла Звеставання Найсвяцейшай Панне Марыі, пілігрымы занясуць свае ўласныя інтэнцыі, інтэнцыі біскупа, а таксама многіх людзей, якіх ім будзе дадзена сустрэць на шляху.
Kс. Юрый Марціновіч
Фота: Вольга Сяліцкая