5-ы дзень паломніцтва распачаўся супольнай малітвай каля крыжа ў вёсцы Кібуці разам з мясцовымі жыхарамі.
Пасля, пераадольваючы кіламетры, паломнікі гарэлі пад сонцам, але гэта не было перашкодай для радаснага спеву і праслаўлення Пана.
Падчас ранішняй канферэнцыі а. Яўген Эйсмант SAC працягнуў разаважанне на тэму граху: "Праз асуджэнне мы закрываемся ад Божага ўздзеяння і Ён не можа выслухаць нашую малітву, пакуль мы не адпусцім свае правіны". Айцец дадаў, што Святая Троіца з'яўляецца сапраўдным сімвалам любові. І калі здаецца, што цябе ніхто не любіць - гэта памылка. Чалавека любяць ажно тры Божыя Асобы.
У вёсцы Палачаны паломнікі мелі магчымасць адправіць св. Імшу, падчас якой кс. Віктар Чабатар CMF разважаў пра Сэрца Божай Маці і Яе бязмежную любоў да кожнага з нас. Пасля Эўхарыстыі ў пілігрымаў быў час на абед і адпачынак, пасля чаго яны далей вырушылі ў шлях.
Вернікаў хутка дагнаў дождж, які надаў сіл на пазасталую частку дарогі. Знікла стомленасць і ў кожнага адкрылася другое дыханне.
90 пілігрымаў ужо дайшло да Маладзечна! За плячыма палова шляху, а наперадзе чакае Маці Божая Будслаўская.
Яна Чайко
Фота: Марыя Чарняк
