Адбылася юбілейная пілігрымка жанчын з Ашмян да Маці Божай Суцяшальніцы Засмучаных у Барунах

5 мая адбылася пілігрымка жанчын, маці, а таксама дзяўчат – будучых маці – з Ашмян у санктуарый Маці Божай Суцяшальніцы Засмучаных у Барунах. Пілігрымка сёлета прайшла ў дзясяты раз.

У шлях вырушыла больш за 250 чалавек не толькі з Ашмян, але і з ваколіц, а таксама з Астраўца і Смаргоні. Удзельнікі пераадолелі 24 км дарогі. Адметнасцю гэтай пілігрымкі з’яўляецца тое, што ў ёй прымаюць удзел толькі жанчыны.

Мамы дзякавалі за свае сужэнствы і за дзяцей і прасілі патрэбных ласкаў для іх, а маладыя дзяўчаты маліліся аб шчаслівым сужэнстве для сябе і выбары жыццёвага шляху.

Жанчынам спадарожнічалі навучэнцы Вышэйшай духоўнай семінарыі ў Гродне. У праграме пілігрымкі былі Гадзінкі да Маці Божай, канферэнцыi, Вяночак да Божай Міласэрнасці і Ружанец. Удзельнікі супольна маліліся аб адвазе для сучасных жанчын, аб тым, каб яны маглі перадаваць жыццё і веру, а таксама каб стаялі на варце чысціні звычаяў.

Па дарозе пілігрымаў вельмі сардэчна віталі жыхары вёсак. Пад спеў марыйных песень пілігрымы ўвайшлі ў Баруны, дзе шмат гадоў у касцёле знаходзіцца цудадзейны абраз Маці Божай Суцяшальніцы Засмучаных. З вялікай узрушанасцю і надзеяй жанчыны сталі са складзенымі рукамі перад абразом, просячы Панну Марыю, каб Божае благаслаўленне спадарожнічала ім і іх сем’ям.

Кульмінацыяй пілігрымкі стала святая Імша, якую ўзначаліў дэкан Ашмянскага дэканату кс. канонік Ян Пузына. Гамілію прамовіў кс. Юрый Варонка, пробашч парафіі Нараджэння Божай Маці ў Гомелі (Пінская дыяцэзія).

Пасля заканчэння ўрачыстасцяў яшчэ шмат жанчын малілася перад абразом Панны Марыі, давяраючы Ёй свае штодзённыя клопаты, цяжкасці, праблемы.

Жанчыны вярталіся дадому, каб быць сапраўдным прыкладам хрысціянскага жыцця і дабрыні, руплівымі місіянерамі ў сваіх сем’ях, сваім прыкладам паказваць шлях да сапраўднага шчасця.

Kс. Юрый Марціновіч

Фота: Сняжана Капыш