У Сапоцкіне недалёка ад Гродна паспяхова вядзецца будаўніцтва Дома для прабывання людзей састарэлага ўзросту.
Гэта адзін з праектаў, скіраваных на інвеставанне ў развіццё інфраструктуры сацыяльна значных аб’ектаў на тэрыторыі дыяцэзіі, якія ў апошні час рэалізуе дабрачыннае каталіцкае таварыства “Карытас” Гродзенскай дыяцэзіі.
20 сакавіка будоўлю наведаў біскуп Гродзенскі Аляксандр Кашкевіч, якога дырэктар гродзенскага “Карытас” кс. д-р Раман Рачко пазнаёміў з працамі, што вядуцца там зараз, і чарговымі этапамі будаўніцтва. Іерарх адзначыў, што за такі кароткі час удалося зрабіць шмат працы, вынікі якой відавочныя ўжо сёння. Біскуп выказаў перакананне, што гэты будынак будзе служыць для дабра Гродзенскай дыяцэзіі.
Зараз у Сапоцкіне аднаўляецца фасад будынка Дома міласэрнасці, які знаходзіцца каля будучага Дома для састарэлых. Таксама ідзе рэканструкцыя яшчэ аднаго будынка ў в. Нецеч (Лідскі дэканат), у якім штогод праходзіць летні адпачынак і “канікулы з Богам” для дзяцей.
Усе гэтыя важныя і вельмі патрэбныя ў нашай дыяцэзіі ініцыятывы, якія ў апошні час актыўна старалася рэалізаваць дабрачыннае таварыства, можа падтрымаць кожны дыяцэзіянін і ўсе людзі добрай волі.
Нагодай для падтрымкі гэтых праектаў можа быць ІІІ нядзеля Вялікага посту, якая ў Каталіцкім Касцёле ў Беларусі традыцыйна адзначаецца як Дзень Caritas. Гэта добрая магчымасць падтрымаць каталіцкую дабрачынную арганізацыю і прыгадаць сабе, як важна быць добрым і міласэрным у сучасным свеце.
Кіраўніцтва гродзенскага “Карытас” шчыра дзякуе добрым людзям за любую духоўную і матэрыяльную дапамогу, а таксама спадзяецца, што ўсё запланаванае абавязкова атрымаецца.
Той, хто мае магчымасць і жаданне далучыцца да рэалізацыі гэтых сапраўды важных спраў, можа патэлефанаваць на дабрачынную лінію на нумар:
89 02 214 22 22 (кошт званка – 3 беларускія рублі)
або пералічыць ахвяраванне на рахунак банка:
УНП 500160938
в белорусских рублях BY81PJCB30156031891000000933
код банка PJCBBY2X ОАО “Приорбанк” ЦБУ 600 г. Гродно.
Kс. Юрый Марціновіч
