20 студзеня ў межах Тыдня малітваў аб еднасці хрысціян Апостальскі Нунцый у Беларусі арцыбіскуп Габар Пінтэр наведаў царкву св. Велікамучаніка немаўляці Гаўрыіла Беластоцкага ў Іўі.
Прадстаўніку Папы спадарожнічалі біскуп Гродзенскі Аляксандр Кашкевіч і духавенства.
Падчас візіту настаяцель святыні протаіерэй Вячаслаў Пашкевіч пазнаёміў гасцей з яе багатай гісторыяй. Святыня зроблена ў будынку, які ў пачатку ХХ ст. быў жылым домам, пасля Вялікай Айчыннай вайны – радзільным домам, а пасля 1970-х гадоў – дзіцячым садком-яслямі.
Госці памаліліся перад іконай св. мучаніка Гаўрыіла Беластоцкага з часцінкай мошчаў.
На заканчэнне протаіерэй уручыў каталіцкім іерархам на памяць пра візіт ікону Казанскай Божай Маці. Нунцый і біскуп Гродзенскі падзякавалі за магчымасць гэтай сустрэчы і выказалі надзею, што Каталіцкі Касцёл і Праваслаўная Царква будуць разам крочыць у братэрстве і міры.
Kс. Юрый Марціновіч
Фота: Баляслаў Гавецкі
