22 лістапада ў гродзенскім пабрыгіцкім касцёле прайшла чарговая сустрэча ў межах “Тыдня талентаў”. Удзельнікі памаліліся разам падчас св. Імшы, пасля чаго мелі магчымасць паслухаць канферэнцыю на тэму “Як адкрыць і не закапаць свае таленты”.
Тэму развіцця здольнасцяў сабраным наблізіў душпастыр моладзі Гродзенскай дыяцэзіі кс. канонік Антоні Грэмза.
На пачатку святар адзначыў, што ў даўнія часы слова “талент” мела два значэнні. Першае - грашовая адзінка, роўная 34-ом кг срэбра, другое – цяжар.
"Бачым, што талент - гэта вялікая каштоўнасць, але адначасова і вялікі груз”, - дадаў кс. Антоні. – Бог, зважаючы на гэта, адорвае кожнага чалавека па ягоным сілам”.
Што трэба ведаць пра талент з пункту гледжання хрысціянскай духоўнасці:
- талент маюць усе, неабходна толькі яго заўважыць і адкрыць;
- адкрыўшы, варта яго развіваць, каб не згас;
- для ўдасканалення талента патрэбны час, высілак і ўменне;
- таленавіты чалавек прыпісвае заслугі Богу, а не сабе;
- часта талент праяўляецца як нешта пакорлівае, таму шматлікіх здольных людзей годна ацэньваюць толькі пасля іх смерці;
- талент – вялікая адказнасць;
- важна правільна выкарыстаць свае дары, каб не закапаць іх ці не нанесці імі шкоду;
- першы крок на шляху распазнання свайго таленту – паверыць у яго наяўнасць. І пачаць дзейнічаць!
АМ
