Перажываючы актаву Усіх Святых, Касцёл асаблівым чынам узносіць малітвы за ўсіх верных памерлых, каб яны як мага хутчэй змаглі дасягнуць вечнага шчасця і бачыць Божае аблічча.
На працягу васьмі дзён супольнасць семінарыі ў Гродне падчас святой Імшы і Літургіі Гадзінаў малілася за памерлых святароў і біскупаў, выхавацеляў і выкладчыкаў, семінарыстаў, ахвярадаўцаў, працаўнікоў і ўсіх людзей добрай волі, якія ў свой час належалі да семінарыйнай сям’і або былі неяк звязаны з ёю.
У апошні дзень актавы, 8 лістапада, Эўхарыстыю за ўсіх блізкіх семінарыі памерлых узначаліў дапаможны біскуп Гродзенскай дыяцэзіі Юзаф Станеўскі. Іерарх падкрэсліў важнасць малітвы за сваіх настаўнікаў у веры, што пацвярджае св. апостал Павел, і значнасць памяці аб сваіх родных, якія адышлі па ўзнагароду да Пана.
Таксама вечарам біскуп узначаліў цэлебрацыю Нешпараў за памерлых, падчас якіх зачытваліся імёны ўсіх, хто прычыніўся да заснавання і развіцця Вышэйшай духоўнай семінарыі ў Гродне.
Актава Усіх Святых – гэта добры час, дадзены Богам, калі мы маем магчымасць адпушчэння караў за грахі пры пэўных умовах. Разважаючы над Божым словам, мы прыходзім да выніку, што малітва за памерлых – святая і пабожная справа, пра якую мы павінны заўсёды памятаць.
Андрэй Юхнік
