7 кастрычніка біскуп Гродзенскі Аляксандр Кашкевіч асвяціў адноўленую капліцу на могілках у парафіі Св. Яна Хрысціцеля ў Воўпе (Мастоўскі дэканат).
Асвячэнне адбылося на заканчэнне сёлетняй адпустовай урачыстасці ў гонар Маці Божай Ружанцовай і ў дзень кананічнай візітацыі парафіі.
Kапліца была пабудавана ў 1873 г. на новых парафіяльных могілках. Грунтоўны рамонт быў выкананы ў гэтым годзе з мая па кастрычнік дзякуючы старанням сённяшняга пробашча парафіі кс. каноніка Віктара Мыслюка і шматлікіх ахвярных людзей, якія падтрымалі гэтую справу матэрыяльна і духоўна.
Асвячаючы капліцу, біскуп Кашкевіч выказаў удзячнасць усім, хто паспрыяў таму, каб яна “атрымала новае жыццё”. “Няхай Богу будзе падзяка за гэтую адноўленую капліцу, якая была ўзведзена стараннямі вашых продкаў”, – дадаў іерарх.
Ва ўрачыстасці прынялі ўдзел шматлікія парафіяне, якія не хавалі сваёй узрушанасці і радасці. Капліца будзе месцам, дзе вернікі асаблівым чынам будуць маліцца за сваіх памерлых, якія спачываюць на гэтых могілках.
Kс. Юрый Марціновіч
Фота: Ева Брыцько
