У апошнія дні лета ў дзятлаўскай парафіі Найсвяцейшай Панны Марыі (Гродзенская дыяцэзія) прайшлі "Канікулы з Богам".
Каб добра падрыхтавацца да новага навучальнага года, дзеці і моладзь мелі магчымасць атрымаць духоўныя настаўленні ад пробашча кс. Здзіслава Пікулы SDB, які ў духу салезіянскай харызмы ўжо па традыцыі з’яўлецца арганізатарам такіх сустрэч і духоўным настаўнікам маладых.
Хоць канікулы — час гульняў і забаваў, аднак і падчас адпачынку варта правільна расставіць прыярытэты. Таму галоўным пунктам летніка была св. Імша.
Падчас Літургіі кожны мог ахвяраваць свой адпачынак Пану Богу, дзякуючы за ўдзел у цудоўнай супольнасці маладых вернікаў. Варта адзначыць, што ўдзельнікі мелі магчымасць добра падрыхтавацца да сакрамэнту споведзі, разважаючы над Святым Пісаннем групах.
Трохдзённы адпачынак дзяцей і моладзі ў Дзятлаве быў непрацяглым, але плённым. Час, праведзены ў супольнасці, дапамог лепш падрыхтавацца да новага навучальнага года, які з’яўляецца чарговым крокам на шляху чалавечага і духоўнага ўзрастання маладога пакалення.
Паводле Catholic.by
