10 чэрвеня ў парафіі Найсвяцейшай Тройцы і св. Францішка Асізскага ў Свіслачы адбылася прыміцыйная святая Імша кс. Андрэя Каўшука.
Урачыстасць прыміцыі пачалася ў родным доме новапрэзбітэра, дзе бацькі ўдзялілі свайму сыну благаслаўленне на шлях святарства.
Затым святары, семінарысты, літургічная служба і большасць вернікаў прайшлі разам з новапрэзбітэрам у працэсіі ад дома да касцёла. Малады святар ішоў у вянку, спецыяльна сплеценым з гэтай нагоды.
Перад касцёлам новапрэзбітэра прывітаў пробашч парафіі а. Валерый Шэйгерэвіч OFM Conv.
Сваю першую Імшу кс. Андрэй Каўшук цэлебраваў у інтэнцыі ўсіх, хто спадарожнічаў яму на шляху да Хрыстовага алтара. Ён маліўся за сваіх блізкіх, з якіх выйшаў, і за тых, да каго ў бліжэйшай будучыні стане пасланы.
Гамілію прамовіў кс. Віталій Сідорка з Ліды, які прысвяціў яе святарству і абавязкам, вынікаючым з яго.
Перад благаслаўленнем прыміцыянт пачуў шмат цёплых слоў у віншаваннях. На заканчэнне літургіі кс. Андрэй удзяліў благаслаўленне святарам, сёстрам законным, семінарыстам, бацькам i ўсім прысутным, а таксама папрасіў аб малітоўнай падтрымцы ў душпастырскім служэнні.
Прэзбітэрскае пасвячэнне кс. Андрэй Каўшук прыняў 9 чэрвеня ў катэдральным касцёле св. Францішка Ксаверыя ў Гродне. Пасвячэнне ўдзяліў біскуп Гродзенскі Аляксандр Кашкевіч.
Kс. Юрый Марціновіч
