8 снежня, ва ўрачыстасць Беззаганнага Зачацця Найсвяцейшай Панны Марыі, біскуп Гродзенскі Аляксандр Кашкевіч удзяліў дыяканскае пасвячэнне тром навучэнцам Вышэйшай духоўнай семінарыі ў Гродне.
Урачыстасць адбылася ў катэдральным касцёле св. Францішка Ксаверыя ў Гродне.
Пасля некалькіх гадоў фармацыі для семінарыстаў Андрэя Каўшука, Эрнэста Мікалайчыка і Рамана Вайцяховіча надышоў час жніва. Праз пасвячэнне дыяканату маладыя людзі былі ўключаны ў духоўны стан, каб, умацаваныя дарам Духа Святога, маглі дапамагаць біскупу і яго прэзбітэрам у служэнні слова і алтара.
Урачыстасць сабрала шматлікіх святароў і вернікаў, якія прыбылі з розных бакоў дыяцэзіі, каб падтрымаць малітвамі кандыдатаў да пасвячэння. Прысутнічалі таксама іх бацькі і прадстаўнікі парафіяльных супольнасцяў, адкуль яны паходзяць.
У гаміліі біскуп Аляксандр Кашкевіч адзначыў, што ўрачыстасць Беззаганнага Зачацця Найсвяцейшай Панны Марыі прыносіць у Касцёле на Гродзеншчыне плён радасці трох новых слуг Божага слова і Эўхарыстыі і нагадвае, што кожнага чалавка Пан Бог адарыў ласкай паклікання да святасці.
“Гэтае пакліканне да святасці і Божага сыноўства паўсюднае, бо датычыць кожнага хрысціяніна. Гэта дар, а адначасова і заданне для выканання. Гэта шлях, на які мы ўступілі ў момант святога хросту, і мэта, да якой імкнёмся праз усё наша жыццё”, – сказаў іерарх.
Біскуп патлумачыў, што, каб чалавк мог дасягнуць гэтай мэты, Бог у сваім Провідзе вызначае кожнаму акрэсленае месца ў жыцці, ставіць перад ім разнастайныя заданні, вядзе кожнага непаўторным шляхам.
“Таму мы можам сказаць, што рэалізуем наша хрысціянскае пакліканне тады, калі з верай і паслухмянасцю адказваем Пану “так” на Яго заклікі”, – дадаў іерарх.
Звяртаючыся да кандыдатаў да дыяканату, біскуп Кашкевіч адзначыў, што яны былі пакліканы Богам ісці за Ім найпрыгажэйшым, хоць і вельмі цяжкім і патрабуючым вялікага прысвячэння шляхам святарскага паклікання.
“Сёння вы распачынаеце апошні, вельмі важны этап падрыхтоўкі да Хрыстовага святарства. Прыміце гэты вялікі дар і рэалізуйце яго з руплівасцю і адказнасцю. Будзьце ўдзячныя Хрысту за давер, які аказаў кожнаму з вас”, – заклікаў іерарх
Гродзенскі ардынарый нагадаў, што праз некалькі месяцаў новыя дыяканы будуць скіраваны да душпастырскага служэння ў парафіяльных супольнасцях Гродзенскай дыяцэзіі і што людзям сёння вельмі патрэбна іх малітва, навучанне, слова Евангелля, добры асабісты прыклад і сведчанне пра Хрыста.
“Сённяшні свет патрабуе сведкаў веры, моцных і адважных, поўных надзеі і любові, працавітых і ахвярных. Няхай у гэтым нялёгкім, але вельмі патрэбным і адказным служэнні спадарожнічае вам заўсёды Божае благаслаўленне”, – сказаў біскуп.
На заканчэнне іерарх пажадаў, каб узорам паслухмянасці Пану Богу і ахвярнай службы бліжнім для іх была заўсёды Беззаганная Панна Марыя, Заступніца семінарыі, i каб кожны чалавек у іх служэнні бачыў дабрыню, любоў і міласэрнасць нашага Пана Езуса Хрыста.
Кожны з кандыдатаў выказаў перад біскупам, сабранымі святарамі і ўсім Божым народам волю прыняць служэнне дыяканату і склаў абяцанні цэлібату і малітвы Літургіі гадзін.
Дыякан Aндрэй Каўшук нарадзіўся 16 лютага 1986 г., паходзіць з парафіі Найсвяцейшай Тройцы і св. Францішка Асізскага ў Свіслачы.
Дыякан Эрнэст Мікалайчык нарадзіўся 1 лютага 1994 г., паходзіць з парафіі Узвышэння Святога Крыжа (Фара) у Лідзе.
Дыякан Раман Вайцяховіч нарадзіўся 30 студзеня 1994 г., паходзіць з парафіі Божай Міласэрнасці ў Гродне (Вішнявец).
Дыяканат з’яўляецца першай з трох ступеняў сакрамэнту пасвячэння. У абрадзе пасвячэння біскуп ускладае на кандыдата рукі, але не для святарства, а для служэння. Дыяканы пакліканы не для таго, каб замяняць святароў, а для таго, каб іх падтрымліваць.
Дыяканы могуць быць упаўнаважаны між іншым да ўдзялення хросту і святой Камуніі, абвяшчэння Божага слова або правядзення пахавання. Яны спаўняюць таксама ролю асістэнтаў біскупаў і прэзбітэраў у літургічных функцыях і розных цэлебрацыях, між іншым заключэнні сужэнства.
Кс. Юрый Марціновіч
Фота: кл. Томаш Мікалайчык
