Валанцёры парафіяльнага “Карытас” у Іўі, які дзейнічае пры касцёле свв. апосталаў Пятра і Паўла, падрыхтавалі святочныя дэкарацыі і ўпрыгажэнні на святы Божага Нараджэння.
За атрыманыя сродкі ад продажу святочных аздабленняў будуць падрыхтаваны падарункі самотным і патрабуючым, якія будуць ім перададзены ў перыяд святаў.
Як адзначыў у размове з карэспандэнтам grodnensis.by кс. Ян Гавецкі, пробашч парафіі, гэтая акцыя праводзіцца ў іўеўскай парафіі кожны год і сустракае вялікую адкрытасць і зычлівасць вернікаў, якія хочуць дзяліцца тым, што маюць.
“Гэтая ініцыятыва вучыць нашых вернікаў быць чулымі і адкрытымі на патрэбы іншых. Часам патрэбна няшмат, каб падарыць іншаму чалавеку радасць і цеплыню”, - дадаў святар.
Па словах кс. Гавецкага, дзяленне з іншымі тым, што маеш сам, заўсёды ўзнагароджваецца, таму што Божы Провід так кіруе жыццём чалавека, што атрымаеш яшчэ больш.
Падобныя акцыі парафіяльны “Карытас” у Іўі, які з’яўляецца філіялам Рэлігійнай місіи “Дабрачыннае каталіцкае таварыства Карытас” Гродзенскай дыяцэзіі, праводзіць некалькі разоў у год з нагоды святаў і ўрачыстасцяў.
Кс. Юрый Марціновіч