Перыяд семінарыйнай фармацыі – гэты незвычайна насычаны, адказны этап, падчас якога малады чалавек паглыбляе сваё пакліканне і ўмацоўваецца ў гатоўнасці прысвяціць жыццё Богу і найбольш патрабуючым. Але асоба будучага святара фарміруецца таксама пад уплывам шматлікіх іншых фактараў, якія вучаць перш за ўсё стаць добрым чалавекам, чалавекам шчырым і спагадлівым, тактоўным і інтэлігентным, добразычлівым і адказным.
З гэтай нагоды ў Вышэйшай духоўнай семінарыі ў Гродне адбылася інтэлектуальная гульня пад назвай “Бітва розумаў”, у якой былі задзейнічаны амаль усе яе навучэнцы. Праграму і пытанні падрыхтаваў прэфект семінарыі кс. Андрэй Лішко. Каманды складаліся з трох навучэнцаў з кожнага курса.
Пытанні падчас гульні датычыліся не толькі рэлігійнага жыцця, але і літаратуры, хіміі, матэматыкі, гісторыі, мастацтва і г. д. Адказ на многія пытанні залежаў ад логікі і кемлівасці ўдзельнікаў. Пераможцамі стала каманда 1 курса.
Правядзенне такога роду мерапрыемстваў стала ўжо добрай традыцыяй у сценах гродзенскай Alma Mater. Падчас іх набываюцца веды, выпрацоўваюцца адпаведныя навыкі, якія, безумоўна, спатрэбяцца семінарыстам у будучай душпастырскай дзейнасці. Навучэнцы вельмі ўдзячныя кіраўніцтву семінарыі за прыемныя хвіліны, атрыманыя падчас гульні, якія дапамагаюць будаваць братэрскую супольнасць у духу сапраўднай хрысціянскай любові.
Яўген Амасёнак, семінарыст
