1 чэрвеня гасцямі Дыяцэзіяльнага дня дзіцяці былі дзіцячыя музычныя супольнасці, якія ўпрыгожылі сваім спевам гэтую сустрэчу.
Спеў з’яўляецца неад’емным элементам свята дзяцей, якое ўжо традыцыйна на працягу 7 гадоў праходзіць у гродзенскай парафіі Беззаганнага Зачацця Найсвяцейшай Панны Марыі. Менавіта спеў яднае і інтэгруе дзяцей, дазваляе ім разам праслаўляць Пана і Створцу.
Першым на сцэне выступіў дзіцячы гурт “Вясёлая грамадка” з Гродна. Сваім спевам яны распачалі свята, якое з’яўляецца заўсёды вялікай падзеяй у Гродзенскай дыяцэзіі. Маленькія спевакі ў каляровых строях, з плюшавымі цацкамі ў руках, нягледзячы на дождж, які ішоў у час выступлення, вельмі парадавалі прысутных.
Выступіў таксама вельмі жывы гурт маладой парафіі Святога Духа ў Гродне “Анёлы”. Дзеці, нават і зусім маленькія, сваім спевам захапілі слухачоў і звярнулі на сябе агульную ўвагу.
Выйшаў на сцэну і дзіцячы гурт “Misterium” з гродзенскай парафіі Маці Божай Анёльскай. Дзеці сваім спевам заахвоцілі ўсіх да танцу і інтэграцыйных забаваў.
Госцем Дня дзіцяці быў таксама гурт "AVE" з Вышэйшай духоўнай семінарыі ў Гродне. Семінарысты падарылі дзецям шмат яскравых эмоцый і ўражанняў. Спяваючы песні, яны разам праслаўлялі Бога, дзякуючы за Найсвяцейшую Панну Марыю, якая сто гадоў таму аб’явілася ў Фаціме і таксама сёння просіць кожнага чалавека жыць згодна з Евангеллем.
На заканчэнне свята кожны з удзельнікаў атрымаў памятныя падарункі ад арганізатараў і сімвалічнае сэрца з напісаным на ім пасланнем, скіраваным Марыяй у Фаціме.
Галоўны арганізатар Дыяцэзіяльнага дня дзіцяці ксёндз Юрый Марціновіч, які з’яўляецца ініцыятарам сустрэчы дзяцей у Гродне, на заканчэнне падзякаваў усім за ўдзел ў сустрэчы, складаючы словы падзякі таксама і ўсім валанцёрам, якія актыўна ўдзельнічалі ў падрыхтоўцы свята.
"Гэта доўгі спіс асобаў і арганізацый, якія духоўным і матэрыяльным чынам падтрымалі гэтую прыгожую справу, і немагчыма пералічыць іх усіх. Без маладых і дарослых валанцёраў і аніматараў, якіх было больш за 100, немагчыма было б падрыхтаваць і так цудоўна рэалізаваць гэтае свята. Дождж, які на пачатку дня крыху сапсаваў нашы планы, у цэлым не быў перашкодай для дзяцей, а нават наадварот – забавай", — адзначыў кс. Юрый Марціновіч.
VII Дыяцэзіяльны дзень дзіцяці завяршыўся, дзеці вярталіся да сваіх дамоў радасныя, але і стомленыя пасля цэлага дня забаваў. Яны вярталіся, каб змяняць свет і саміх сябе, і, як прасіла Марыя, памятаць пра малітву, а цяжкія справы, якія будуць спатыкаць у жыцці, пераадольваць з любові да Бога.
Анастасія Мішкура
Фота Аляксандра Сергеюка
