25 сакавіка, ва ўрачыстасць Звеставання Пана, у гродзенскім рэктаральным касцёле Звеставання Найсвяцейшай Панне Марыі (пабрыгіцкім) адбылася адпустовая ўрачыстасць.
На cвятой Імшы прысутнічалі жыхары Гродна, мясцовае духавенства і навучэнцы Вышэйшай духоўнай семінарыі ў Гродне. У гэты дзень сваё свята адзначала таксама супольнасць правінцыяльнага законнага дома ў Гродне Кангрэгацыi Сясцёр Найсвяцейшай Сям’і з Назарэта.
Адпустовую Імшу цэлебраваў біскуп Гродзенскі Аляксандр Кашкевіч.
У гэты дзень многія вернікі далучаюцца да ініцыятывы "Духоўнае ўсынаўленне". Гэта добрая магчымасць выратаваць ад смерці ненароджанае дзіця, якому пагражае аборт, падтрымліваючы яго сваімі малітвамі.
У гаміліі біскуп Аляксандр Кашкевіч адзначыў, што Звеставанне Пана з’яўляецца вельмі вялікай падзеяй у гісторыі збаўлення.
„Сын Божы – спрадвечнае Слова Айца – становіцца чалавекам і, перш чым пабачыў Яго свет, пачынае сваё зямное жыццё пад сэрцам Найсвяцейшай Панны Марыі”, - сказаў іерарх.
Біскуп дадаў, што Тая, якую Бог спрадвеку абраў быць Маці Свайго Сына, першая пачула радасную навіну аб прыйсці ў свет Збаўцы, і, больш за тое, рэалізацыя гэтага Божага плану залежала ад Яе згоды. “Гэта азначала адмовіцца ад уласных планаў і чаканняў адносна будучыні, цалкам даверыцца Пану Богу і пайсці ў невядомы шлях, які Ён сам укажа”, - патлумачыў гродзенскі ардынарый.
Іерарх заўважыў, што Звеставанне Найсвяцейшай Панне Марыі з’яўляецца ў пэўным сэнсе вобразам кожнага хрысціянскага паклікання і нагадвае, што сапраўдная вера засноўваецца на даверы Богу.
„Верыць – гэта значыць давяраць Пану Богу і казаць Яму „fiat” кожны дзень. Верыць – гэта быць гатовым прыняць з рукі Бога ўсё, што Ён для нас падрыхтаваў”, - сказаў біскуп.
На заканчэнне іерарх заклікаў вернікаў у штодзённай гонцы жыцця заўсёды знаходзіць Бога, давяраць Яму сваё жыццё і на ўзор Панны Марыі спаўняць Яго волю.
Адпустовая ўрачыстасць завяршылася выстаўленнем Найсвяцейшага Сакрамэнту і благаслаўленнем.
Кс. Юрый Марціновіч
Фота: Вольга Сяліцкая
