14 жніўня склала свае першыя манаскія абяцанні сястра Імэльда Пятрова са Смаргоні, якая належыць да Кангрэгацыі Сясцёр Найсвяцейшай Сям’і з Назарэта. Урачыстасць адбылася ў касцёле Найсвяцейшага Цела і Крыві Хрыста ў Чэнстахове (Польшча).
Святую Імшу ўзначаліў Мітрапаліт чэнстахоўскі арцыбіскуп Вацлаў Дэпо. На ўрачыстасць прыбылі сёстры назарэтанкі на чале з Генеральнай настаяцельніцай Кангрэгацыі Сясцёр Найсвяцейшай Сям’і з Назарэта с. Янай Завеяй.
На гэтай важнай для ўсёй манаскай супольнасці падзеі прысутнічала і дэлегацыя сясцёр назарэтанак з Беларусі. Законніцы падтрымлівалі такім чынам сваімі малітвамі с. Імэльду, каб яна заўсёды ішла за голасам Езуса Хрыста, які кліча да служэння ў сваім Касцёле.
Падчас урачыстасці асаблівым чынам маліліся аб новых пакліканнях у супольнасць сясцёр назарэтанак.
Сястра Імэльда атрымала ў гэты дзень таксама знешнія знакі складання абяцанняў: чорны вэлюм як знак поўнай прыналежнасці Хрысту, крыж як знак дарогі да вечнага жыцця, свечку – знак Хрыстовага святла і новага жыцця, канстытуцыю супольнасці як “права любові”.
Кангрэгацыя Сясцёр Найсвяцейшай Сям’і з Назарэта была заснавана ў І Нядзелю Адвэнту ў 1875 г. у Рыме благаслаўлёнай Францішкай Сядліскай.
Кс. Юрый Марціновіч
