6 снежня, ва ўрачыстасць Аб'яўлення Пана, Мітрапаліт Мінска-Магілёўскі арцыбіскуп Тадэвуш Кандрусевіч цэлебраваў св. Імшу ў гродзенскім катэдральным касцёле імя св. Францішка Ксаверыя. Арцыбіскуп наведаў Гродзенскую дыяцэзію з нагоды свайго 70-гадовага юбілея, які адзначыў 3 студзеня бягучага года.
"Ксёндз арцыбіскуп нарадзіўся на землях Гродзеншчыны, у Адэльску, таму ён вельмі цешыцца, што свята Трох Каралей і свой юбілей ён можа адзначыць разам са сваімі зямлякамі", - адзначыў кс. бп. Аляксандр Кашкевіч на пачатку св. Імшы.
У сваім пастырскім слове, скіраваным да прысутных, арцыбіскуп Тадэвуш Кандрусевіч нагадаў аб двух сімвалічных значэннях свята Аб'яўлення Пана:
- Па-першае, Езус нарадзіўся ў паганскім свеце, паказваючы, што Збаўленне - гэта дар для кожнага. Па-другое, свята Аб'яўлення Пана - гэта місыйнае свята. Нованароджанага Езуса прыйшлі прывітаць тры караля, якія пасля вырушылі абвяшчаць Праўду ўсяму свету. І мы таксама павінны дзяліцца атрыманым дарам, як гэта рабілі валхвы.
Яшчэ адзін прыклад, які мы павінны пераймаць ад каралей - гэта распазнаванне Божых знакаў. Для трох каралей неба было як адкрытая кніга, з дапамогай якой яны знайшлі дарогу да Праўды. Так і мы павінны чытаць неба, якое над намі, каб распазнаць жэсты нашага Госпада.
Затым вернікі павіншавалі арцыбіскупа Т. Кандрусевіча з 70-гадовым юбілеем, а Мітрапаліт падзякаваў прысутным за пажаданні і Богу за дар жыцця.
Згодна з даўняй традыцыяй свята Аб'яўлення Пана на заканчэнне св. Імшы адбылося асвячэнне золата, крэйды, кадзіла і вады.
Падрыхтавала Ангеліна Марцішэўская
Фота: Ангеліна Пакачайла
