13 красавіка Касцёл успамінаў ўваход Езуса Хрыста ў Ерузалем для здзяйснення пасхальнай таямніцы. У Пальмовую нядзелю ўжо стала традыцыяй штогадовая працэсія вернікаў з вербачкамі. Святочнае шэсце моладзі са шматлікіх парафій дыяцэзіі з пабернардынскага ўзгорка да Фарнага касцёла праз Савецкую плошчу ўзначаліў ксёндз біскуп Аляксандр Кашкевіч. Глядзіце наш фотарэпартаж.
На пачатку выйшаў прывітаць моладзь кс. Валеры Быкоўскі. Ён адразу заўважыў, што на пабернардынскім узгорку сабралася моладзь з усяго Гродна, а таксама з Ліды, Ваўкавыска і іншых парафій дыяцэзіі. Кожная парафія падрыхтавала вялікія вербы з галінак туі ці елкі, упрыгожаныя кветкамі, стужкамі, малюнкамі і надпісамі.
Усе вербы былі прыгожыя, але на агульным фоне вылучалася, як заўсёды, вярба АД “OPEN”. Як пракаментаваў кс. Антоні Грэмза, духоўны кіраўнік душпастырства: “молімся на ружанцы да Маці Божай Вастрабрамскай, апякункі Гродзенскай дыяцэзіі, за дыяцэзію і за біскупа”. 13 красавіка 1991г. Святы Айцец благаслаўлёны Ян Павел II заснаваў Гродзенскую дыяцэзію. Адначасова з Булай аб заснаванні нашай дыяцэзіі 23 гады таму Святы Айцец падпісаў таксама Булу аб выбранні і абвяшчэнні Аляксандра Кашкевіча Лацінскім Гродзенскім Біскупам.
Пасля прачытання Евангелля кс. бп Аляксандр Кашкевіч традыцыйна асвяціў вербачкі і ўзначаліў працэсію.
Спевамі ў працэсіі кіравала моладзь з катэдральнай парафіі.
Пасля ўрачыстага ўваходу, на ўспамін ўваходу Пана, ў катэдры распачалася св. Імша.
У гаміліі ксёндз біскуп Аляксандр падкрэсліў: “як нельга перажыць радасць велікоднай раніцы без драмы Вялікай пятніцы, так нельга зразумець Хрыста і Яго збаўчую місію ў адрыве ад таямніцы крыжа.”(…) “Няма Хрыста без крыжа, а хрысціянства без таго, каб ісці за Езусам, было б хрысціянствам без Езуса.”
Іерарх звярнуўся да моладзі: “свету патрэбна ваша сведчанне веры, напамін, што веру трэба перажываць заўсёды маладым сэрцам, незалежна ад таго, колькі нам гадоў”.
Напрыканцы літургіі ксёндз біскуп заахвоціў моладзь да ўдзелу ў набажэнствах Пасхальнага Трыдуума, каб радасць Вялікадня была поўнай і чыстай.
Сёлета ўрачыстую Эўхарыстую на Пальмовую нядзелю, або Нядзелю Мукі Пана, музычна аздабляў гурт "Міласць" з парафіі Ліда-фара, які пасля св. Імшы заспяваў яшчэ некалькі песень.
Марына Белаблоцкая
Фота: Вольга Сяліцкая
