19 студзеня ў будынку Вышэйшай духоўнай семінарыі ў Гродне адбылася аплаткавая сустрэча для ўдзельнікаў малітоўнага руху “Маргарытка”.
Галоўная мэта гэтага руху – штодзённая малітвa за святароў. Члены руху здзяйсняюць яе з любоўю, разумеючы, што для духавенства неабходная такая падтрымка.
Удзельнікі прыбылі з розных месцаў Гродзенскай дыяцэзіі. Сустрэча была для іх магчымасцю праславіць на Эўхарыстыі Нованароджнага Пана і, дзелячыся аплаткай, выказаць адзін аднаму пажаданні.
Прысутных прывітаў мадэратар руху “Маргарытка” Гродзенскай дыяцэзіі кс. Ян Раманоўскі.
Сустрэча пачалася святой Імшой, якую ўзначаліў біскуп Гродзенскі Уладзімір Гуляй. У цэлебрацыі ўдзельнічалі біскуп эмерыт Аляксандр Кашкевіч і некалькі прэзбітэраў.
У гаміліі біскуп Гродзенскі засяродзіўся на тым пытанні, які распазнаць прысутнасць Езуса ў сваім жыцці. Па словах іерарха, гэтую прысутнасць нялёгка заўважыць сярод цяжкасцяў і пакутаў. Аблічча Збаўцы можна не заўважыць таксама сярод паўсядзённых спраў, дадаў ён.
У гэтых абставінах, адзначыў біскуп, “на дапамогу прыходзіць Маці Езуса, Марыя”: трэба “ісці за Яе інтуіцыяй”, быць гатовымі “зрабіць усё, што скажа Езус”, як параіла Маці Божая ў Кане Галілейскай. “Сапраўды, ты не ўбачыш цуду Езуса, калі будзеш трывала трымацца сваіх перакананняў, замыкаючыся ў сваім цярпенні, прыгнечанасці, безнадзейнасці, – дадаў пастыр Касцёла на Гродзеншчыне. – Трэба даверыць Пану сітуацыю, у якой ты знаходзішся. Скажы ў малітве, на адарацыі: “Пане, я ўжо не магу, мяне перарастае цярпенне, мой крыж. Як мне справіцца з праблемамі ў доме, адсутнасцю працы ці цяжкасцямі ў паразуменні з дзецьмі? Пане, я сам не магу”. Патрэбна гэтае адкрыццё, выхад з “бункера” сваёй штодзённасці. Марыя сёння паказвае табе: паслухай, што Ён скажа табе зрабіць, зрабі ўсё, але паўтараю: усё”.
Біскуп падкрэсліў, што да словаў Пана трэба ставіцца не выбарачна, а рабіць менавіта “ўсё, што Ён скажа”.
“Сваім сумневам не перашкаджай Богу аб’явіцца ў тваёй штодзённасці. Дазволь весці сябе праз жыццё, нават там, дзе, здаецца, Бога быць не можа. Зрабі ўсё, што скажа табе Пан. Прыслухайся да голасу Марыі, і слава Езуса аб’явіцца і ў цяжкасцях, і ў турботах”, – заахвоціў біскуп.
Пасля Імшы ўдзельнікі сустрэчы падзяліліся аплаткай. Гэта адбывалася ў прыемнай сардэчнай атмасферы, было выказана шмат цёплых пажаданняў, нібы ў сапраўднай сям’і, дзе жыве клопат, любоў і міласэрнасць да кожнага.
Біскуп Гродзенскі падзякаваў усім, хто ўваходзіць у рух “Маргарытка” – гэтую малітоўную сям’ю – за кожную малітву ў інтэнцыі духоўных асобаў. Іерарх падкрэсліў, што дзякуючы іх малітве святары могуць рэалізоўваць сваё пакліканне, служыць Богу і людзям, узрастаць у асабістай святасці і дасканаласці, даваць добры прыклад.
Прэс-служба Гродзенскай дыяцэзіі
Фота: Станіслаў Бервячонак
