15 жніўня ў парафіі Унебаўзяцця Найсвяцейшай Панны Марыі ў Дзятлаве адзначылі адпустовую ўрачыстасць тытулу касцёла.
Урачыстасць сабрала шматлікіх святароў, парафіян і гасцей. Таксама ў ёй удзельнічалі прадстаўнікі раённай улады, сельгаспрадпрыемстваў раёна, дзятлаўчане, якія прыйшлі ў святыню для благаслаўлення снапоў, садавіны, агародніны.
Па традыцыі біскупа прывіталі ў брамах касцёла хлебам і соллю, кветкамі і салодкім падарункам. Хор “Ветэраны ў страі” сустрэў іерарха і ўсіх шаноўных гасцей свята песняй “Багародзіца”.
Пробашч кс. Здзіслаў Пікула прывітаў усіх прысутных і падкрэсліў, што ўрачыстасць Унебаўзяцця Маці Божай – вялікае свята для вернікаў Дзятлаўшчыны і падзея, якой яны чакаюць увесь год.
Біскуп у гаміліі адзначыў, што Маці Божая атрымала ад Пана незвычайную ўзнагароду за сваё цудоўнае, бязгрэшнае, дасканалае жыццё, якое было падобным да найпрыгажэйшых кветак.
“Жыццё Марыі было надзвычай цудоўным, бо ў ім не было ані ценю граху, ані крупінкі эгаізму, ані найменшага супраціўлення Божай волі. Найсвяцейшая Маці з пачатку да канца была вернай і пакорнай Слугой Пана”, – сказаў іерарх.
Пастыр Касцёла на Гродзеншчыне дадаў, што Бог быў адзінай радасцю Панны Марыі, Яна любіла Яго ўсім сэрцам, служыла Яму свядома і дабравольна кожны дзень свайго зямнога жыцця.
Па словах іерарха, згодна з традыцыяй, як гэта рабілі на працягу стагоддзяў нашы продкі, у гэты дзень вернікі прыносяць у святыні звязкі найпрыгажэйшых кветак, першыя плады, лекавыя травы і каласы збожжа.
“Такім чынам мы жадаем сімвалічна падзякаваць Пану Богу за прывілею ўнебаўзяцця, удзеленую Найсвяцейшай Маці. Таксама сёння мы дзякуем Богу за благаслаўленне, якім Ён адарыў людзей, якія працуюць на палях, за дар добрага, спрыяльнага надвор’я, за ўрадлівую глебу, за сёлетні ўраджай пладоў і збожжа”, – сказаў іерарх.
Як адзначыў біскуп, трэба пастаянна памятаць, што Пан Бог – адзіны, хто дае ўсялякае дабро.
“Дарэмныя і бясплённыя намаганні чалавека, калі ім не спадарожнічаюць Божае благаслаўленне і ласка. З Божай жа дапамогай усё магчымае, а Пан Бог заўсёды спрыяе тым, хто ў Яго верыць і на Яго ўскладае надзею”, – падкрэсліў іерарх.
На Імшы да алтара былі прынесены дары: крыж, букет кветак, хлеб, ружанец, сноп каласоў сёлетняга ўраджаю. Такім чынам парафіяне дзякавалі Богу за ўсе дары, атрыманыя ад Яго, асабліва за ўраджай гэтага года.
У канцы Імшы біскуп благаславіў кветкі, садавіну і агародніну, снапы каласоў.
Урачыстасць завяршылася эўхарыстычнай працэсіяй вакол касцёла.
Прэс-служба Гродзенскай дыяцэзіі