Падчас сімпозіума на тэму мас-медый, які адбыўся 25-26 лютага ў Баранавічах, кс. абп Тадэвуш Кандрусевіч у сваім прывітальным слове да ўдзельнікаў сімпозіума паведаміў, што на пачатку верасня ў Гродне адбудзецца І Агульнабеларускі з’езд каталіцкіх мас-медый. Па словах арцыбіскупа, у Гродна будуць запрошаны працаўнікі мас-медый, журналісты, супрацоўнікі радыё і тэлебачання, інтэрнэта і ўсе, хто працуе ў свецкіх і касцёльных мас-медыях. Іерарх таксама падкрэсліў, што падчас сустрэчы будзе склікана каталіцкае таварыства журналістаў і выпрацавана яго агульная дэкларацыя. Кс. Павел Салабуда, адказны за развіццё медый у Гродзенскай дыяцэзіі, адзначыў, што сёння Касцёл у Беларусі патрабуе такой сустрэчы.
– Дзякуючы падтрымцы і апецы ксяндза аб-па Тадэвуша Кандрусевіча, які ўвесь час падкрэслівае, што Касцёл у сваёй вялікай евангелізацыйнай дзейнасці павінен быць медыйным, а таксама ў духу евангелізацыі дасягнуць кожнага чалавека, і нарадзілася думка арганізацыі гэтай сустрэчы, – адзначыў кс. Павел.
Па словах арганізатараў, з’езд каталіцкіх сродкаў масавай інфармацыі ў Беларусі прынясе шмат новых ідэй і вырашэнняў у сферы медыйнай працы. Як адзначыў кс. абп Тадэвуш у Баранавічах, будзе выпрацавана агульная мадэль, якая будзе служыць лепшай дзейнасці каталіцкіх СМІ ў Беларусі.
