3 чэрвеня ў Навагрудку адбылося ўрачыстае благаслаўленне фігуры і калоны Арханёла Міхала. Урачыстасць прайшла ў касцёле св. Арханёла Міхала, яе ўзначалілі Апостальскі нунцый у Беларусі арцыбіскуп Антэ Ёзіч і біскуп Гродзенскі Аляксандр Кашкевіч.
Святкаванне пачалося семінарам, прысвечаным Арханёлу. Пробашч парафіі кс. доктар Юрый Жэгарын прывітаў прысутных, затым былі прачытаны даклады. З дакладам “Анёльскі свет паводле святога Тамаша Аквінскага” выступіў а. Міхал Ермашкевіч OP, з дакладам “Ушанаванне святога Міхала Арханёла ў духоўнай і культурнай традыцыі Беларусі” – кс. доктар Віталь Сідорка.
Пасля семінара адбылася святая Імша, цэлебрацыю якой узначаліў арцыбіскуп Антэ Ёзіч з удзелам біскупа Гродзенскага, іншых святароў, гасцей, прадстаўнікоў гарадской улады ў Навагрудку і вернікаў парафіі, а таксама дыяцэзіяльнага хору “Cantate Domino”.
Апостальскі нунцый выказаў радасць з магчымасці ўзначаліць гэтую цэлебрацыю ў старажытным навагрудскім касцёле. Ён адзначыў, што Арханёл Міхал з’яўляецца таксама апекуном Ватыкана і Папа Францішак на пачатку свайго пантыфікату пажадаў змясціць яго фігуру ў Ватыканскіх садах. Нунцый дадаў, што гэты святы – “змагар са злым духам, прычынай маральнага заняпаду і падзелаў”.
Прадстаўнік Папы распавёў у гаміліі пра сутнасць анёлаў: “Анёлы ва ўсіх сваіх іерархіях ніколі не задавольваюцца пакланеннем і служэннем Богу. Падобным чынам усе мы, па просьбе саміх анёлаў, пакліканы рэалізаваць сябе ў пакланенні, хвале і служэнні Пану, каб быць пасланцамі міру і місіянерамі Нябеснага Айца. Сапраўдныя лекі для нашых неспакойных і загубленых душаў, адзіныя, здольныя вылечыць нашы раны і вызваліць нас ад зла, – гэта знаходзіцца ў прысутнасці Бога, любячы Яго і дазваляючы Яму любіць нас у малітве Ягонай пяшчотай”.
“Анёлы блізкія да нас і з’яўляюцца вялікімі і сапраўднымі сябрамі пілігрымуючага чалавецтва на зямлі, аж да таго, што тая самая малітва падкрэслівае, што анёлы і людзі пакліканы да супрацоўніцтва, каб прывесці Божы план збаўлення да спаўнення ў гісторыі. Знаходжанне ў небе – як гэта здараецца з анёламі – не азначае быць адарваным ці далёкім; наадварот, гэта азначае быць там, дзе ўсё бачна і ўсё прынятае. Калі мы хочам клапаціцца пра зямныя рэчы, нам трэба паглядзець з вышыні, і тады мы зможам іх лепш зразумець”, – сказаў арцыбіскуп Антэ Ёзіч.
“Каб лепш зразумець, чаму ў многіх нашых супольнасцях святога Міхала Арханёла абралі апекуном, трэба задумацца, кім ён з’яўляецца і чым займаецца. Ён стаіць на чале нябесных войскаў і разам з імі змагаецца супраць таго, хто імкнецца разбурыць сям’ю Божую, народ веруючых у Хрыста, каб прыцягнуць іх да свайго панавання і вырваць з сыноўства Божага. Жыццё і гісторыя з’яўляюцца вялікім полем бітвы, дзе д’ябал змагаецца супраць Бога і супраць справы адкуплення свайго Сына, Які заўсёды ўдзельнічае ў гісторыі, каб рэалізаваць новае стварэнне”, – патлумачыў Апостальскі нунцый.
Іерарх падкрэсліў, што наяўнасць такога святога, як Арханёл Міхал, у якасці заступніка – дар, які трэба прыняць, і адказнасць, якую трэба ўзяць. “Арханёл Міхал, наш заступнік, дапамагае нам зрабіць так, каб чалавек ніколі не замяняў Бога і не дазваляў іншым ідалам заняць сваё месца”, – дадаў прадстаўнік Папы.
Арцыбіскуп заклікаў звярнуцца да Арханёла Міхала, каб ён суправаджаў людзей і дапамагаў ім, “асабліва ажыўляючы веру, міласэрнасць і надзею ўсіх жыхароў гэтага старажытнага горада Навагрудка”.
Пасля Імшы адбыўся абрад благаслаўлення калоны і фігуры святога Арханёла. Была прачытана малітва аб заступніцтве над Беларуссю.
Марына Раманчук
Фота: Кірыл Масалыка