31 мая, калі Касцёл святкуе Адведзіны Найсвяцейшай Панны Марыі, гудагайская парафія адзначыла ўрачыстасць тытулу касцёла.
Драўляную святыню ў Гудагаі пабудавала ў 1763 годзе Людвіка Ганна Война з Сулістроўскіх, якая разам са сваім мужам і вернікамі навакольных мясцовасцяў пажадала аддаць хвалу Богу і Найсвяцейшай Маці ў Яе выяве, што ўжо тады лічылася славутай ласкамі. Такім чынам касцёл Адведзін Найсвяцейшай Панны Марыі ў Гудагаі стаў таксама мэтай пілігрымаў, якія прыбывалі сюды з просьбамі аб аздараўленні фізічным, маральным і духоўным.
Кармэліты босыя, апекуны касцёла, у хроніках запісалі шматлікія сведчанні дзеяння Пана Бога ў гэтым святым месцы. У наш час Гудагай шырока вядомы не толькі ў Беларусі, але і за яе межамі, а галоўны адпуст у гонар Маці Божай Шкаплернай (у гэтым годзе пройдзе 15-16 ліпеня) збірае тысячы вернікаў.
Як паведамляе karmel.by, у дзень урачыстасці тытулу касцёла ў Гудагаі цэлебравалі дзве святыя Імшы.
Эўхарыстыю апоўдні ўзначаліў дэкан Ашмянскага дэканату кс. канонік Ян Пузына, пробашч парафіі св. Міхала Арханёла ў Ашмянах. У гаміліі ён заахвоціў будаваць адносіны адзін з адным на грунце хрысціянскіх праўдаў.
Вячэрнюю Імшу ўзначаліў дэкан Астравецкага дэканату кс. канонік Юзаф Багдзевіч, біскупскі вікарый і пробашч парафіі святых Космы і Дам’яна ў Астраўцы. Гамілію прамовіў пробашч парафіі Маці Божай Шкаплернай у Мядзелі а. Генрых Валейка OCD, настаяцель супольнасці кармэлітаў, які паходзіць з Гудагая.
Кармэліт засяродзіў разважанне на тэме адзінства вернікаў і ўзаемнай адказнасці.
Разам з парафіянамі і гасцямі санктуарыя маліліся шматлікія святары з Астравецкага дэканату, Астраўца і іншых месцаў нашай краіны.
Святкаванне завяршылася маёвым набажэнствам, эўхарыстычнай працэсіяй вакол касцёла, урачыстым спевам “Цябе, Бога, праслаўляем” і благаслаўленнем сабраных Найсвяцейшым Сакрамэнтам.
