24 лютага ў курыі Гродзенскай дыяцэзіі прайшла сустрэча арганізацыйнага камітэта па падрыхтоўцы ўрачыстасцей у дыяцэзіяльным санктуарыі Маці Божай Каралевы нашых сем’яў. Сёлетні фэст у Тракелях адбудзецца 7–9 ліпеня пад дэвізам “Марыя, аб’яднай нашы сэрцы і сем’і!”.
Біскуп Гродзенскі Аляксандр Кашкевіч і іншыя члены камітэта вырашылі, што план урачыстасцей будзе набліжаны да фармату мінулых гадоў. У пятніцу 7 ліпеня пасля сустрэчы і прывітання пілігрымаў для іх у 18.00 будзе цэлебравана св. Імша.
Галоўная св. Імша адбудзецца на наступны дзень 8 ліпеня ў 13.00.
У плане ўрачыстасцей – абрад аднаўлення сужэнскіх абяцанняў, а таксама адарацыя Найсвяцейшага Сакраманту на тэму “Марыя, адары мяне дарам мацярынства”.
Падчас тракельскага фэсту будуць арганізаваны супольныя малітвы і набажэнствы. У іх актыўны ўдзел прымуць парафіі і духоўныя асобы, якія сёлета святкуюць юбілеі. Падрабязны план будзе зацверджаны пазней.
Даведка
На мінулагодніх ліпеньскіх урачыстасцях у Тракелях прысутнічала каля 13-ці тысяч чалавек.
Прэс-служба Гродзенскай дыяцэзіі
