6 студзеня, ва ўрачыстасць Аб’яўлення Пана, арцыбіскуп эмерыт Тадэвуш Кандрусевіч цэлебраваў святую Імшу ў гродзенскай катэдры св. Францішка Ксаверыя.
Разам з ім Эўхарыстыю канцэлебравалі біскуп Гродзенскі Аляксандр Кашкевіч і пробашч катэдральнай парафіі кс. канонік Ян Кучынскі.
На Імшы, у якой удзельнічалі шматлікія вернікі, здзяйснялася благаслаўленне крэйды. Пасля людзі пазначаюць гэтай крэйдай дзверы сваіх дамоў і іншых памяшканняў у знак таго, што прымаюць Божае благаслаўленне.
У прамоўленым Божым слове арцыбіскуп Кандрусевіч засяродзіў увагу на ўніверсальнасці місіі Езуса быць Збаўцам усіх людзей і небяспецы секулярызацыі на шляху да збаўлення.
Іерарх нагадаў, што Тры Каралі, якіх успамінаюць ва ўрачыстасць Аб’яўлення Пана, былі язычнікамі, але, тым не менш, ім таксама аб’явіўся Збаўца. Яны, па словах арцыбіскупа, не задавальняліся багаццем і інтэлектуальнымі здольнасцямі, а шукалі таго, хто можа задаволіць самыя глыбокія прагненні чалавечага сэрца, і знайшлі ў Бэтлееме.
Арцыбіскуп адзначыў, што перашкодай на шляху да Збаўцы ў сучасным свеце з’яўляецца секулярызацыя, якая аддае перавагу свецкім справам перад духоўнымі: гэта азначае лічыць важным толькі тое, што адбываецца тут і цяпер, не цікавіцца пытаннямі існавання Бога, несмяротнасці душы або вечнага прызначэння чалавека.
Іерарх дадаў, што з чыста прагматычнага пункту гледжання секулярызацыя імкнецца да чалавечага прагрэсу, не беручы пад увагу духоўнае вымярэнне асобы; прыхільніка секулярызацыі хвалюе толькі зямное часовае жыццё, а не рэлігія і вечнасць.
“Калі наша ўвага сканцэнтравана толькі на “тут і цяпер”, то вельмі лёгка глядзець на духоўныя справы згодна з духам маральнага рэлятывізму і казаць: “Ну і што, у касцёле я веруючы, а ў жыцці ўсё залежыць ад абставін і сітуацыі – захаваць Божы закон або не”. Такім чынам у жыццё чалавека ўводзіцца не згодная з Божым законам сітуацыйная этыка, – патлумачыў іерарх. – Гэта не што іншае, як залаты цялец ненатуральнай свабоды, як кажа Папа Бэнэдыкт XVI – найвялікшы тэолаг нашага часу, якога нядаўна Бог паклікаў да сябе. У сваім навучанні ён папярэджваў аб небяспецы секулярызацыі Еўропы і спусташэння вучэння Касцёла праз наступленне маральнага рэлятывізму, як самай вялікай пагрозы для Касцёла на пачатку ХХІ стагоддзя”.
Арцыбіскуп заклікаў вернікаў не зацыклівацца на секулярных тэндэнцыях, а браць прыклад з Трох Мудрацоў “у пошуку вечнай праўды, якой ёсць Хрыстус і Яго Евангелле”, бо “гэтая праўда чыніць нас свабоднымі і вядзе да будавання шчаслівага жыцця на зямлі і дасягнення радасці вечнага жыцця”.
Таксама іерарх павіншаваў праваслаўных вернікаў са святам Раства Хрыстова і пажадаў ім благаслаўлення Бэтлеемскага Немаўляткі на святы і ў гэтым новым годзе.
У той жа дзень арцыбіскуп Тадэвуш Кандрусевіч наведаў сваю малую радзіму – Адэльск, дзе ў старадаўнім касцёле цэлебраваў Імшу для сваіх землякоў.
Прэс-служба Гродзенскай дыяцэзіі