29 верасня ў парафіі св. Міхала Арханёла ў Смаргоні адбылася штогадовая адпустовая ўрачыстасць у гонар галоўнага нябеснага заступніка парафіі.
На працягу дня вернікі ўдзельнічалі ў Імшах у гонар святога. Галоўная адпустовая Імша цэлебравалася вечарам. На ўрачыстасці сабраліся шматлікія парафіяне і духавенства.
Урачыстасці папярэднічала духоўная падрыхтоўка парафіі. На працягу дзевяці дзён вернікі маліліся навэнну да святога Арханёла, у ноч з 28 на 29 верасня ў касцёле было арганізавана вігілійнае чуванне, на якім прадстаўнікі розных парафіяльных груп і колаў маліліся ў інтэнцыях парафіі і Айчыны; перад адпустовай Эўхарыстыяй вернікі ўпершыню праспявалі гадзінкі ў гонар апекуна парафіі.
Узначаліў адпустовую Імшу дапаможны біскуп Мінска-Магілёўскай архідыяцэзіі Аляксандр Яшэўскі SDB. У гаміліі іерарх звярнуў увагу на важнасць Божага слова ў нашым жыцці. Біскуп падкрэсліў, што ўважлівае слуханне і прыняцце Слова Пана дае гарантыю таго, каб зрабіць у жыцці правільны выбар.
На Эўхарыстыю прыбылі шматлікія госці: кс. Віктар Гайдукевіч SDB, вікарый дэлегата беларускіх салезіянаў, кс. Здзіслаў Пікула SDB, пробашч з Дзятлава, кс. Юзаф Занеўскі SDB, пробашч з Жупран, кс. Леанард Станкоўскі, пробашч з Солаў, кс. Антоні Казлоўскі, пробашч з Вішнева, кс. Уладзіслаў Сурвіла, пробашч з Войстама і Данюшава, кс. Павел Гардзейчык, пробашч з Жодзішак, кс. Юрый Церабей, пробашч з Крэва. Прысутнічалі смаргонскія салезіяне і сёстры салезіянкі. Важнай таксама была прысутнасць старшыні мясцовага райвыканкама Генадзія Харужыка.
Пасля Імшы адбылася тэафарычная працэсія па вуліцах горада, якую ўзначаліў біскуп Аляксандр Яшэўскі. Пасля эўхарыстычнага шэсця сабраныя праспявалі радаснае “Te Deum”, а затым вырушылі да манаскага дома салезіянаў, дзе былі ўсталяваны фігура Божай Маці і памятная табліца ў гонар 100-гадовага юбілею прысутнасці таварыства св. Францішка Сальскага на беларускіх землях.
Наталля Субко