11 верасня ў парафіі св. Міхала Арханёла ў Смаргоні адбылося сапраўднае свята. Парафіянін гэтай супольнасці кс. Марк Найдзіч SDB, які нядаўна атрымаў прэзбітэрскае пасвячэнне, цэлебраваў прыміцыйную Імшу.
Першыя крокі веры і салезіянскага паклікання неапрэзбітэр рабіў менавіта ў гэтай парафіі. Тут ён прыняў хрост, першую Камунію, быў міністрантам, гітарыстам моладзевага гурта, салезіянскім аніматарам.
Парафіянам, якія ведаюць яго не першы год, было вельмі прыемна бачыць яго ў святарскіх шатах у якасці галоўнага цэлебранта найсвяцейшай Ахвяры.
На свята прыбылі родныя, блізкія, сябры неапрэзбітэра, святары і законныя сёстры. Галоўным госцем быў кс. Павел Шчарбіцкі SDB, які з нядаўняга часу спаўняе функцыю дэлегата Рэлігійнай каталіцкай місіі св. Францішка Сальскага ў Беларусі.
Літургічнае дзеянне пачалося благаслаўленнем, удзеленым прыміцыянту яго бацькамі, якія, чынячы знак крыжа над сынам, далі яму ў руку драўляны крыж – знак цярпення разам з Хрыстом.
Прыміцыянт у працэсіі пад гук касцёльнага звана ўвайшоў у святыню. Падчас працэсіі гучала мелодыя спеву “Пан, калі ішоў узбярэжжам” у выкананні трубача.
Ксёндз Павел прамовіў гамілію, у якой падкрэсліў важнасць чалавечых адносін і прабачэння.
Пасля Імшы дэлегацыі салезіянаў, моладзі і парафіянаў выказалі прыміцыянту віншаванні і цёплыя словы.
Кс. Артур Ляшнеўскі SDB
