27 жніўня рэлігійная каталіцкая місія імя святога Францішка Сальскага правяла ў Смаргоні спартыўны фестываль у гонар юбілею стагоддзя дзейнасці салезіянскага таварыства на тэрыторыі сучаснай Беларусі.
На мерапрыемства былі запрошаны ўсе жадаючыя, а асаблівым чынам члены салезіянскай сям’і, былыя выхаванцы араторыяў і моладзь, як паведамляе sdb.by.
Свята спорту пачалося малітвай і супольным пасілкам. Потым адбыліся спартыўныя гульні і спаборніцтвы.
Пасля прайшоў таварыскі футбольны матч паміж салезіянамі, якіх прадстаўлялі браты салезіяне, салезіяне супрацоўнікі і былыя выхаванцы араторыя, і моладдзю. Матч доўжыўся сто хвілін. Нягледзячы на сімвалічны статус сустрэчы, гульня была дастаткова напружанай, ініцыятыву перахоплівала то адна, то іншая каманда, да апошняй хвіліны не было ясна, хто будзе пераможцам.
У выніку перамаглі салезіяне з лікам 19:21, які ў кантэксце юбілейнага года таксама выглядае сімвалічна, бо менавіта ў 1921 годзе салезіяне прыбылі ў Беларусь. Акрамя футболу, удзельнікам былі прапанаваны і іншыя заняткі, у тым ліку стэнды, дзе можна было атрымаць салодкія падарункі.
Завяршылася мерапрыемства супольнай вячэрай, узнагародай удзельнікаў і традыцыйным салезіянскім слоўкам на добрую ноч. Яго прамовіў рэгіянальны настаяцель салезіянскага таварыства на Беларусі ксёндз Павел Шчарбіцкі SDB, які разам з камандай салезіянаў змагаўся за перамогу на футбольным полі.
