30 ліпеня ў парафіі св. Яна Хрысціцеля ў Васілішках (Шчучынскі дэканат), дзе служаць міхаліты – законнікі з Кангрэгацыі святога Арханёла Міхала, – з удзелам біскупа Гродзенскага Аляксандра Кашкевіча адзначылі 100-годдзе з часу кананічнага зацвярджэння гэтай супольнасці.
Урачыстая Імша падзякі сабрала шматлікіх парафіян і гасцей, у тым ліку прадстаўнікоў мясцовай улады. Прыбылі запрошаныя святары і сёстры законныя. Прысутныя разам дзякавалі за дар, якім з'яўляюцца міхаліты для Гродзенскай дыяцэзіі, і за іх ахвярнае служэнне.
Усіх прывітаў пробашч парафіі кс. Станіслаў Пытэль CSMA. Святар нагадаў, што ўрачыстасць была запланавана на мінулы год, але з-за пандэміі не магла адбыцца, таму праходзіць сёлета, на заканчэнне юбілейнага года гэтай манаскай сям'і.
Як дадаў пробашч, Божы Провід, верагодна, учыніў так, што падчас гэтых святкаванняў група моладзі прымае сакрамэнт канфірмацыі. Напэўна, гэта сапраўды невыпадкова, бо між іншым харызмай Кангрэгацыi святога Арханёла Міхала, заснаванай у Польшчы на пачатку ХХ стагоддзя благаслаўлёным ксяндзом Браніславам Маркевічам, з'яўляецца клопат пра дзяцей і моладзь, у тым ліку пра найбяднейшых сярод іх, занядбаных, пакінутых і асірацелых.
Біскуп Аляксандр Кашкевіч цэлебраваў Імшу ў інтэнцыі ўсёй парафіяльнай супольнасці на чале з яе душпастырам і законнымі сёстрамі з Кангрэгацыі Сясцёр св. Міхала Арханёла (міхаліткі).
У гаміліі іерарх падкрэсліў, што супольнасць Міхала Арханёла – „вялікі дар не толькі для яе членаў, але і вельмі ўзбагаціла ўвесь Касцёл, выдатна прычынілася i далей прычыняецца да пашырэння Божага Валадарства на зямлі, абвяшчэння Добрай Навіны і сведчання веры сучаснаму свету”.
У далейшай частцы гаміліі біскуп звярнуў увагу на постаць благаслаўлёнага заснавальніка міхалітаў, ксяндза Браніслава Маркевіча, які быў, несумненна, Божым чалавекам, руплівым святаром, сведкам Хрыста і прарокам свайго часу.
Пастыр Касцёла на Гродзеншчыне адзначыў, што заснаваная ксяндзом Маркевічам супольнасць перанесла выпрабаванне часам, жыве і развіваецца. „Толькі Пан Бог ведае, колькім маладым людзям ва ўсім свеце міхаліты дапамаглі ўвайсці ў дарослае жыццё, набыць адукацыю і занятак, вытрываць у веры і не сапсавацца маральна”, – дадаў іерарх.
Маладым людзям, якім у Васілішках асабліва служаць ксяндзы міхаліты і сёстры міхаліткі, біскуп пажадаў быць заўсёды руплівымі ў хрысціянскім жыцці на ўзор заснавальніка гэтай супольнасці.
Таксама біскуп падзякаваў манаскай сям'і міхалітаў за больш чым трыццацігадовую прысутнасць у мясцовым Касцёле, якая прыносіць цудоўныя плёны.
„Адраджаецца жывы Касцёл, развіваецца парафіяльнае душпастырства, паўсталі новыя касцёлы і капліцы, парафіяльныя дамы і катэхетычныя класы, адрамантаваны і адноўлены святыні, якія ў эпоху ваяўнічага атэізму былі забраны ў вернікаў, а потым вернуты ў стане, вартым жалю”, – пералічыў заслугі міхалітаў іерарх.
На заканчэнне Эўхарыстыі дзеці і моладзь падзякавалі свайму пробашчу і законным сёстрам Станізіі і Міхаліне за клопат аб іх духоўным развіцці.
Старшыня ААТ „Васілішкі” Антон Бурнос ад імя прадстаўнікоў мясцовай і раённай улады выказаў кс. Станіславу Пытэлю юбілейныя віншаванні і падзяку за душпастырскую апеку над парафіяй.
У Беларусі міхаліты служаць у Гродзенскай дыяцэзіі (парафіях св. Яна Хрысціцеля ў Васілішках, святых апосталаў Пятра і Паўла ў Старых Васілішках, Найсвяцейшай Тройцы ў Шылавічах) і Мінска-Магілёўскай архідыяцэзіі (парафіях Маці Божай Ружанцовай у Мінску і св. Міхала Арханёла ў Гатаве).
Прэс-служба Гродзенскай дыяцэзіі