Пры дыяцэзіяльным санктуарыі Маці Божай Каралевы нашых сем’яў у Тракелях (Радунскі дэканат) адбыўся пленэр пад назвай “Пейзаж у маім сэрцы”, у якім прынялі ўдзел дзеці і моладзь.
Асноўнай мэтай правядзення мерапрыемства былo перш за ўсё захоўванне гісторыка-культурнай спадчыны, выхаванне мастацкага густу, пачуцця прыгожага, развіцця творчых здольнасцяў у падрастаючага пакалення.
Кожнаму ўдзельніку пленэру кусташ санктуарыя кс. Юрый Бяганскі ўручыў на памяць нявялікія сувеніры.
Арганізатары і ўдзельнікі выказалі кусташу словы ўдзячнасці за гасціннасць і цёплы прыём.
Працы, створаныя юнымі жывапісцамі, стануць асновай мастацкай выставы, якая пройдзе з 1 па 10 ліпеня бягучага года.
Па вяртанні ў Ліду працы ўдзельнікаў пленэру ацаніла журы. “Яны былі розныя і вельмі цікавыя”, – адзначыў старшыня журы Мікалай Бандарчук, Заслужаны дзеяч мастацтваў Рэспублікі Беларусь, старшыня Гродзенскага аддзялення “Саюз мастакоў Беларусі”, выкладчык Гродзенскага дзяржаўнага каледжа мастацтваў.
Старшыня журы падкрэсліў, што ў старэйшай узроставай групе ўдзельнікаў (14-16 гадоў) адчуваецца прафесійны почырк, у малодшай – непасрэднасць.
У кожнай з груп прызавыя месцы дасталіся лідчанам, выхаванцам Лідскай дзіцячай школы мастацтваў. Дыпломы атрымалі Ангеліна Пацук, Елізавета Орда, Ганна Субач, Яна Студзянцова, Ульяна Жышка, Арцём Радчанка, Дар’я Пуйдак.
Прэс-служба Гродзенскай дыяцэзіі