Біскуп Кашкевіч удзяліў сакрамэнт канфірмацыі вернікам парафіі ў Суботніках

23 красавіка біскуп Гродзенскі Аляксандр Кашкевіч наведаў парафію св. Уладзіслава ў Суботніках (Іўеўскі дэканат).

На адпустовай Імшы ў гонар святога Юрыя, мучаніка, іерарх удзяліў сакрамэнт хрысціянскай сталасці групе моладзі і старэйшых вернікаў парафіі.

На Эўхарыстыі прысутнічалі сведкі і родныя кандыдатаў да канфірмацыі, а таксама шматлікія парафіяне.

Пробашч кс. Аляксандр Лебядзевіч, вітаючы прысутных, адзначыў, што візіт іерарха ў парафію – заўсёды вялікая падзея, якой чакаюць вернікі. Ён папрасіў біскупа Аляксандра агарнуць сваімі малітвамі падчас Эўхарыстыі моладзь, якая прыступае да канфірмацыі, і ўсю парафію, каб вернікі сваім штодзённым жыццём маглі даваць іншым прыклад добрага хрысціяніна.

У гаміліі кс. Юрый Марціновіч, прэс-сакратар Гродзенскай дыяцэзіі, адзначыў, што Пан Бог нястомна ўдзяляе кожнаму чалавеку шматлікія ласкі і дары. Святар падкрэсліў, што “сілай Бог нікому не дае сваіх дароў, а толькі робіць прапанову, чакаючы, што чалавек адкрые сваё сэрца”.

На заканчэнне Імшы тыя, хто прыняў сакрамэнт хрысціянскай сталасці, абавязаліся быць сведкамі Уваскрослага Пана на сваёй вучобе і працы, выказалі ўдзячнасць біскупу, а таксама ўсім, хто рыхтаваў іх да гэтай вялікай падзеі.

У сваю чаргу пастыр Касцёла на Гродзеншчыне выказаў перакананне, што прыняты сакрамэнт дапаможа ім, найперш моладзі, быць вернымі Езусу Хрысту і імкнуцца з кожным днём станавіцца ўсё лепшымі хрысціянамі і людзьмі.

Біскуп пажадаў, каб гэтыя дары Духа Святога прынеслі шчодры плён у жыцці тых, хто стаў умацаваны імі.

Прэс-служба Гродзенскай дыяцэзіі

Фота: Людміла Пясецкая