Велікодны абед для бедных у Гродне: нягледзячы на цяжкасці жыцця, трэба мець надзею

12 красавіка ў доме Кангрэгацыі Найсвяцейшай Сям’і з Назарэта (назарэтанкі) у Гродне з нагоды набліжэння святаў Уваскрасення Пана адбыўся абед для маламаёмных і людзей без пэўнага месца жыхарства.

Такі абед, які арганізуецца пры падтрымцы Рэлігійнай місіі “Дабрачыннае каталіцкае таварыства “Карытас”” Гродзенскай дыяцэзіі, стаў ужо традыцыяй у горадзе над Нёманам. Сёлета ў ім удзельнічала больш за 100 чалавек.

Прысутных, якія знаёмыя з убоствам і цярпеннем, частавалі супам, запечанымі каўбаскамі з рысам і салёнымі агуркамі, а на дэсерт – велікодным кулічом. Безумоўна, кожны атрымаў таксама маляванае яйка – сімвал новага жыцця. Дзяленне велікодным яйкам мае братэрскі характар і служыць умацаванню сувязяў.

Перад спажываннем святочнага пасілку ўсіх прысутных прывітаў дырэктар дабрачыннага таварыства “Карытас” кс. канонік Раман Рачко. Затым біскуп Гродзенскі Аляксандр Кашкевіч благаславіў ежу, якую атрымалі ўдзельнікі абеду.

Звяртаючыся да іх, іерарх пажадаў ім, нягледзячы на разнастайныя цяжкасці, з якімі яны сустракаюцца штодзень, непахіснай надзеі. Як заўважыў пастыр Касцёла на Гродзеншчыне, гэтую надзею прыносіць свету і людзям Уваскрослы Езус Хрыстус, які з любові да чалавека аддае сваё жыццё.

Біскуп пажадаў прысутным вясёлых святаў Уваскрасення Пана, запэўніўшы, што Касцёл пра іх заўсёды памятае і па меры сваіх магчымасцяў будзе іх падтрымліваць.

На тварах сабраных можна было сапраўды ўбачыць радасць. Яны цешыліся, як дзеці, атрымліваючы з рук сясцёр назарэтанак велікодныя яйкі.

З іх вуснаў можна было пачуць цёплыя словы ўдзячнасці за ўсё, што робіць для іх кожны дзень Гродзенская дыяцэзія. Хоць часта яны адчуваюць холад, адсутнасць нармальных умоваў для жыцця, гора і нястачу, у гэты дзень яны змаглі аддзячыць цяплом сваіх сэрцаў.

Няхай іх малітва, якую на сустрэчы яны ўзносілі разам, дойдзе да Бога і будзе выслухана, каб як мага менш людзей у нашым горадзе, краіне і свеце жыло ў нечалавечых умовах.

Кс. Юрый Марціновіч