З 1 па 3 красавіка ў Навагрудку прайшлі рэкалекцыі для дзяўчат. Велікапосныя духоўныя практыкаванні былі арганізаваны Кангрэгацыяй Найсвяцейшай Сям’і з Назарэта (назарэтанкі).
“Узрадуюцца зламаныя косткi” – такой была тэма рэкалекцый. Удзельніц было шмат, з розных куткоў Беларусі: Гродна, Мінска, Стаўбцоў, Ліды, Докшыц, Гервят, Удзела, Навагрудка і Івянца.
Прысутныя разважалі пра жыццё караля Давіда і пра найвялікшую Божую міласэрнасць. Лепш пазнаёміцца з гісторыяй Давіда і больш зразумець пра Божае прабачэнне, любоў і міласэрнасць дапамагаў брат капуцын Уладзіслаў Мінько.
Дзяўчаты разам удзельнічалі ў Крыжовым шляху. Быў час, каб паразважаць над Божым словам і падзяліцца ў групах сваімі разважаннямі і высновамі. Таксама можна было задаваць пытанні, на якія адказвалі святар і сёстры.
Вялікае ўражанне ва ўдзельніц пакінуў майстар-клас сястры Назарыі Міклаш CSFN, з якога дзяўчаты зразумелі, як Пан ачышчае кожную ад граху і робіць прыгожым сэрца.
Вясёлы вечар суботы прайшоў інтэлектуальным чынам, у выглядзе гульні “Што? Дзе? Калі?”, падчас якой дзяўчаты ахвотна адказвалі на пытанні. Злучала ўсіх супольная малітва, а таксама малітва, якой яны напачатку паабяцалі маліцца адна за адну.
Галоўным момантам рэкалекцый была адарацыя Найсвяцейшага Сакрамэнту, якая доўжылася ўсю ноч і на якой у кожнай з удзельніц быў час сапраўды пабыць з Езусам сам-насам, адкрыцца перад Ім і дазволіць Яму ўвайсці ў кожнае сэрца.
У апошні дзень рэкалекцый дзяўчаты дзяліліся ўражаннямі і тым, што кранула іх. Гучалі розныя адказы, але з усіх можна зрабіць адну выснову: ім вельмі спадабаліся канферэнцыі брата Уладзіславa і яго адкрытае сэрца, чуласць і клопат сясцёр, якія адорвалі кожную любоўю і апекай і дзяліліся досведам свайго жыцця.
“Богу важная не мая ідэальнасць, а толькі калі я буду шчырай перад Ім і перад сабою. Ён жадае адарыць мяне Сваёю любоўю і міласэрнасцю. Мне толькі трэба прыняць гэта і заўсёды памятаць, што Ён настолькі мяне любіць, што ўсё прабачыць і ніколі не адкіне”, – такія былі словы адной з удзельніц. Дзяўчаты вельмі ўдзячныя за магчымасць гэтай сустрэчы, а таксама ўжо цяпер чакаюць наступных рэкалекцый.
Вікторыя Папко
Фотa: с. Ганна Мaцуль CSFN