29 студзеня ў гродзенскім касцёле Маці Божай Анёльскай, дзе служаць айцы францішкане, адбылося “развітанне з Дзіцяткам Езусам ля стаенкі”.
Вечар распачаў пробашч парафіі а. Сяргей Мігун OFM Conv, які прывітаў усіх прысутных. Затым прайшоў імправізаваны канцэрт калядных песень, у якім мог удзельнічаць кожны жадаючы.
Дзеці з вялікай радасцю прынеслі свае таленты ў падарунак маленькаму Езусу. Яны гралі на музычных інструментах, такіх як домра і баян, выконвалі любімыя калядныя спевы. Больш за ўсё парадавалі прысутных самыя маленькія вучні парафіяльнай нядзельнай школы.
Яркім, радасным і запамінальным было выступленне ўдзельнікаў хору “Містэрыум”. Калядныя спевы, якія прагучалі ў іх выкананні, сталі сапраўдным упрыгажэннем вечару з Езусам.
Вечар скончыўся сумеснай малітвай з благаслаўленнем Дзіцяткі Езуса. Кожны з прысутных мог ушанаваць маленькага Езуса асабіста.
Сустрэча была радаснай і душэўнай, удзельнікі пакідалі яе з усмешкамі на тварах і з Богам у сэрцах.
Алена Жэгала
Фота: Баляслаў Гавецкі