У Іўеўскім раёне сталі ўжо добрай традыцыяй сустрэчы кіраўніцтва раёна з духавенствам. Гэта яшчэ адна магчымасць абмеркаваць пытанні, звязаныя з кансалідацыяй, духоўна-маральным аздараўленнем грамадства, пазначыць кропкі судакранання ўлады і духавенства ў агульных пытаннях.

Як паведамляе ivyenews.by, на гэты раз на сустрэчу са старшынёй райвыканкама Ігарам Генцам былі запрошаны каталіцкія святары і імам мусульманскай мячэці ў Іўі.

Вітаючы гасцей, старшыня райвыканкама назваў асаблівым брэндам раёна тое, што на іўеўскай зямлі ў міры і згодзе на працягу стагоддзяў жывуць прадстаўнікі розных канфесій.

“Касцёл у сваёй аснове мае тую ж задачу, што і ўлада – стварэнне на дабро раёна, а значыць, узаемадзеянне рэлігійных супольнасцяў і органаў улады павінна будавацца на агульных інтарэсах”, – падкрэсліў Ігар Генец.

Кіраўнік раённай улады дадаў, што агульныя мэты духавенства і ўлады накіраваны на фарміраванне сацыяльнага і духоўнага здароўя жыхароў раёна, прафілактыку правапарушэнняў і п’янства, пажарную бяспеку і шэраг іншых важных пытанняў, на вырашэнне якіх трэба ўплываць комплексна. Касцёл, з’яўляючыся важным духоўным інстытутам, дае неабходныя арыенціры грамадству, і гэта датычыцца не толькі рэлігіі.