19 снежня пры санктуарыі Гродзенскай дыяцэзіі Маці Божай Каралевы нашых сем’яў у Тракелях (Радунскі дэканат) адбылася аплаткавая сустрэча для валанцёраў і іх дзяцей.
На ўжо традыцыйную сустрэчу перад святамі Божага Нараджэння былі запрошаны тыя, хто бескарысліва дапамагае ў арганізацыі і правядзенні розных мерапрыемстваў, перш за ўсё штогадовых адпустовых урачыстасцяў у санктуарыі.
На сустрэчы кусташ кс. доктар Юрый Бяганскі падзякаваў усім прысутным валанцёрам за час, які яны ахвяруюць на карысць развіцця дыяцэзіяльнага санктуарыя, і за іх самаадданасць.
З нагоды блізкіх святаў Нараджэння Пана святар пажадаў, каб кожны ў гэты святочны час мог адчуць сапраўдную радасць, якую прыносіць у свет Збаўца. Кусташ пажадаў міру і згоды, а таксама ўзаемнай павагі ў кожным доме і сям’і.
Прэс-служба Гродзенскай дыяцэзіі
