Напярэдадні ўспаміну святой Цэцыліі, панны і мучаніцы, у касцёле Маці Божай Анёльскай у Гродне (францішканскім) адбыўся канцэрт дзіцячага хору “Містэрыум”. Падчас канцэрту дзеці і моладзь парадавалі парафіян спевам і ігрой на музычных інструментах.
Таксама ў гэты дзень шэрагі дзіцячага хору папоўніліся новымі талентамі. Новыя ўдзельнікі былі ўрачыста прыняты ў склад хору на святой Імшы.
Свята працягнулася салодкім сталом з тортам і духоўнымі спевамі.
Успамін святой Цэцыліі – апякункі касцёльнай музыкі і харыстаў – адзначаецца ў Паўсюдным Касцёле 22 лістапада. Да гэтага дня прымяркоўваюцца музычныя фестывалі і канцэрты.
Алена Жэгала
